کراچی (Karachi) کے جناح اسپتال میں ایک خاتون مریضہ کی مبینہ طور پر واش روم میں بچے کی پیدائش کے واقعے نے تنازع کھڑا کر دیا ہے، جس پر مریضہ کے اہل خانہ نے ڈاکٹروں کی مبینہ غفلت کا الزام عائد کیا ہے۔

اہل خانہ کے مطابق خاتون کو گائنی وارڈ میں داخل کیا گیا تھا جہاں انہیں تقریباً چار گھنٹے انتظار کرنا پڑا۔ ان کا کہنا ہے کہ بروقت طبی امداد نہ ملنے کے باعث خاتون نے واش روم میں بچے کو جنم دیا، جس دوران گھر کی خواتین نے ان کی مدد کی۔

واقعے سے متعلق سوشل میڈیا پر ویڈیوز بھی سامنے آئی ہیں جن میں خاتون اپنا مؤقف بیان کر رہی ہیں، جبکہ ایک ویڈیو میں مبینہ طور پر واش روم کی حالت بھی دکھائی گئی ہے۔

دوسری جانب جناح اسپتال کی انتظامیہ نے ان الزامات کو مسترد کرتے ہوئے مؤقف اختیار کیا ہے کہ خاتون کی ڈلیوری واش روم میں نہیں بلکہ لیبر روم کے اندر ہوئی۔

مزید پڑھیں؛سمبڑیال: معروف ٹک ٹاکر حکیم بابر کو مبینہ طور پر شربت میں زہریلی چیز پلانے کا واقعہ

ترجمان کے مطابق مریضہ نادیہ زوجہ اکرم کو ایمرجنسی میں فوری طبی معائنہ اور کلینیکل اسیسمنٹ کے بعد نارمل ڈیلیوری کے لیے لیبر روم منتقل کیا گیا، جہاں رات 2 بج کر 50 منٹ پر ایک صحت مند بچے کی ولادت ہوئی۔

اسپتال انتظامیہ نے مزید کہا کہ واش روم میں بچے کی پیدائش کے دعوے درست نہیں۔ ترجمان کے مطابق مریضہ میں کچھ پیچیدہ طبی مسائل بھی پائے گئے تھے، جن کی وجہ سے انہیں خصوصی نگرانی میں رکھا گیا، تاہم بعد ازاں لواحقین انہیں طبی مشورے کے برعکس اسپتال سے لے گئے۔

ادھر اسپتال انتظامیہ کی ہدایت پر واقعے کی تحقیقات کے لیے انکوائری کمیٹی تشکیل دے دی گئی ہے، جو تمام پہلوؤں کا جائزہ لے کر اپنی سفارشات پیش کرے گی۔