عالمی منڈی میں منگل کے روز سونے کی قیمتوں(Gold Rates) میں نمایاں اضافہ ریکارڈ کیا گیا، کیونکہ سرمایہ کار امریکا اور ایران کے درمیان کشیدگی کم کرنے کے لیے جاری سفارتی کوششوں پر گہری نظر رکھے ہوئے ہیں۔ ماہرین کے مطابق اگر دونوں ممالک کے درمیان تنازع میں کمی آتی ہے تو خام تیل کی قیمتوں سے پیدا ہونے والے مہنگائی کے دباؤ میں بھی نرمی آ سکتی ہے، جس سے امریکی فیڈرل ریزرو (Federal Reserve) کی آئندہ شرح سود کی پالیسی متاثر ہونے کا امکان ہے۔

عالمی مارکیٹ میں اسپاٹ گولڈ کی قیمت 0.9 فیصد اضافے کے ساتھ 4,042.69 ڈالر فی اونس تک پہنچ گئی، جبکہ اگست میں ڈیلیوری کے لیے امریکی گولڈ فیوچرز 0.8 فیصد اضافے کے بعد 4,047.40 ڈالر فی اونس پر ٹریڈ ہوتے رہے۔

ٹیسٹی لائیو (tastylive) کے گلوبل میکرو ہیڈ ایلیا سپیواک (Ilya Spivak) کے مطابق سونا 4 ہزار ڈالر فی اونس کی سطح کے قریب مضبوط بنیاد بنانے کی کوشش کر رہا ہے اور موجودہ حالات میں اس کی قیمت مزید بڑھنے کی گنجائش موجود ہے۔ ان کا کہنا تھا کہ مشرق وسطیٰ کی صورتحال اب بھی مارکیٹ پر اثرانداز ہو رہی ہے، تاہم سرمایہ کار ان خبروں کو پہلے کے مقابلے میں نسبتاً محدود اہمیت دے رہے ہیں۔

مزیدپڑھیں:چار سدہ اور ہزارہ موٹر وے ٹریفک کیلئے بند! پولیس کی ہنگامی ٹریفک ایڈوائزری جاری

دوسری جانب امریکا اور ایران کے درمیان ثالثی کی اطلاعات، دونوں ممالک کی جانب سے حالیہ حملوں اور یمن کے حوثی باغیوں کی جانب سے سعودی عرب کے خلاف بحری ناکہ بندی کی دھمکی کے باعث عالمی تیل کی قیمتوں میں معمولی نرمی دیکھی گئی، جس سے سرمایہ کاروں کے خدشات میں کچھ کمی آئی۔

ادھر ایک سینئر ایرانی عہدیدار نے خبر رساں ادارے رائٹرز کو بتایا کہ تہران کو ثالث ممالک کی جانب سے 10 روزہ جنگ بندی کی تجویز موصول ہوئی ہے۔ اس تجویز کا مقصد گزشتہ ماہ طے پانے والے عبوری معاہدے کو برقرار رکھنا اور مستقل جنگ بندی کی راہ ہموار کرنا ہے، جسے خطے میں کشیدگی کم کرنے کی اہم سفارتی کوشش قرار دیا جا رہا ہے۔

مالیاتی منڈیوں کی توجہ اب امریکی فیڈرل ریزرو کے آئندہ اجلاس پر مرکوز ہے۔ مارکیٹ میں عمومی توقع ہے کہ فیڈ آئندہ ہفتے شرح سود برقرار رکھے گا، تاہم سی ایم ای فیڈ واچ ٹول (CME FedWatch Tool) کے مطابق ستمبر میں شرح سود میں اضافے کے امکانات 64 فیصد تک پہنچ چکے ہیں۔

ماہرین کا کہنا ہے کہ بلند شرح سود سونے جیسے ایسے اثاثوں کی کشش کم کر دیتی ہے جو سرمایہ کاروں کو براہ راست منافع یا سود فراہم نہیں کرتے، اسی لیے فیڈ کی آئندہ پالیسی سونے کی قیمتوں کے لیے اہم کردار ادا کرے گی۔

دیگر قیمتی دھاتوں میں بھی مثبت رجحان دیکھا گیا۔ چاندی کی قیمت میں 2.2 فیصد اضافہ ریکارڈ کیا گیا، جبکہ پلاٹینم اور پیلیڈیم دونوں کی قیمتوں میں 0.8 فیصد اضافہ ہوا۔