ایم کیو ایم پاکستان کے رہنماء زاہد ملک نے کہا ہے کہ اگست کا مہینہ اللہ تعالیٰ کا شکر ادا کرنے کا مہینہ ہے، جس نے پاکستانی قوم کو آزادی جیسی عظیم نعمت عطا کی، جبکہ پاکستان کو حقیقی معنوں میں اسلامی فلاحی ریاست بنانے اور بہتر طرز حکمرانی کے لیے نئے انتظامی یونٹس کا قیام وقت کی اہم ضرورت ہے۔

متحدہ قومی موومنٹ پاکستان (ایم کیو ایم پاکستان) کی جانب سے یومِ آزادی کے سلسلے میں جاری “ماہِ آزادی” تقریبات کے تحت فیصل آباد میں ایک خصوصی تقریب کا انعقاد کیا گیا، جس میں پاکستان کے 79ویں یومِ آزادی کی مناسبت سے سالگرہ کا کیک کاٹا گیا۔

تقریب میں ایم کیو ایم پاکستان کے مرکزی رہنما اور بین الصوبائی تنظیمی کمیٹی کے جوائنٹ انچارج زاہد ملک (Zahid Malik) نے دیگر رہنماؤں اور کارکنوں کے ہمراہ کیک کاٹا، جبکہ بانیٔ پاکستان قائد اعظم محمد علی جناح (Muhammad Ali Jinnah)، شاعرِ مشرق علامہ محمد اقبال (Allama Muhammad Iqbal)، تحریکِ آزادی کے قائدین، کارکنوں اور شہداء کو زبردست خراجِ عقیدت پیش کیا گیا۔ اس موقع پر فاتحہ خوانی بھی کی گئی۔

تقریب سے خطاب کرتے ہوئے زاہد ملک نے کہا کہ برصغیر کے عظیم مسلمانوں نے بے مثال قربانیاں دے کر آزاد پاکستان کا خواب شرمندۂ تعبیر کیا۔ انہوں نے کہا کہ لاکھوں مسلمانوں نے اپنی جانوں کا نذرانہ پیش کیا تاکہ آنے والی نسلیں ایک آزاد وطن میں زندگی گزار سکیں۔

انہوں نے کہا کہ مہاجرین کی قربانیاں پاکستان کی تاریخ کا ناقابلِ فراموش باب ہیں اور اگر مہاجرین عظیم قربانیاں نہ دیتے تو آزادی کا حصول ممکن نہ ہوتا۔ انہوں نے زور دیا کہ ان قربانیوں کو ہمیشہ یاد رکھا جانا چاہیے۔

مزیدپڑھیں:نورا فتیحی کا مراکش فٹبالر کے ساتھ تعلقات کی خبروں پر ردعمل، اداکارہ نے حقیقت بیان کر دی

زاہد ملک نے اپنے خطاب میں کہا کہ پاکستان کو اسلامی فلاحی مملکت بنانے، عوامی مسائل کے حل اور مؤثر گورننس کے قیام کے لیے نئے انتظامی یونٹس تشکیل دینا ناگزیر ہو چکا ہے۔ ان کا کہنا تھا کہ بہتر انتظامی نظام ہی ملک کی ترقی اور عوامی خوشحالی کی ضمانت بن سکتا ہے۔

انہوں نے شہداء کے خلاف بیان بازی کرنے والے عناصر کی شدید مذمت کرتے ہوئے کہا کہ ایسے افراد قابلِ مذمت ہیں اور پوری قوم کو ان کے خلاف متحد ہو کر آواز بلند کرنی چاہیے۔

تقریب کے دوران افواجِ پاکستان کی وطن کے دفاع کے لیے دی جانے والی قربانیوں کو بھی زبردست خراجِ تحسین پیش کیا گیا۔ شرکاء نے شہداء اور ان کے اہلِ خانہ کو سلام پیش کیا اور ملکی سلامتی، استحکام اور شہداء کے بلند درجات کے لیے خصوصی دعا بھی کی۔

تقریب میں ایم کیو ایم پاکستان فیصل آباد زون کے صدر ذوالفقار مرزا (Zulfiqar Mirza) سمیت دیگر عہدیداروں، کارکنوں اور بڑی تعداد میں پارٹی رہنماؤں نے شرکت کی۔