بھارت کے دارالحکومت نئی دہلی کے علاقے ویسٹ دہلی (Tilak Nagar) میں ایک 21 سالہ طالبہ و ماڈل کو اس کے گھر کے اندر بے دردی سے چھریوں کے وار کر کے قتل کر دیا گیا۔ پولیس کے مطابق مقتولہ کی شناخت مسکان کے نام سے ہوئی ہے اور قتل کا شائبہ اس کے جِم ٹرینر عمران پر ظاہر کیا جا رہا ہے جو واقعے کے بعد سے فرار ہے۔

پولیس کے مطابق بدھ کے روز مسکان اپنی رہائش گاہ کی دوسری منزل پر واقع اپارٹمنٹ میں اکیلی موجود تھی کہ ملزم عمران نے اس پر چھری سے حملہ کر دیا۔ مسکان کی دردناک چیخیں سن کر جب پڑوسی ان کے گھر کی طرف بھاگے تو وہ خون میں لت پت پڑی تھی۔ پڑوسیوں نے اسے فوری طور پر تشویشناک حالت میں اسپتال منتقل کیا، تاہم وہ زخموں کی تاب نہ لاتے ہوئے دم توڑ گئی۔

مزیدپڑھیں:مدارس کے بینک اکاؤنٹس سے متعلق دیرینہ مسئلے کے حل میں اہم پیشرفت

دوست اور اہلخانہ کے انکشافات
مقتولہ کے دوست امان نے میڈیا سے گفتگو کرتے ہوئے بتایا کہ مسکان 3 بہنوں میں سب سے چھوٹی تھی۔ اس کی بڑی بہن (جو اس وقت چندی گڑھ میں تھی) نے فون کر کے امان کو فوری طور پر گھر پہنچنے کے لیے کہا کیونکہ کسی نے مسکان کو چھریاں مار دی ہیں۔

امان نے دعویٰ کیا کہ مسکان کے اہلخانہ نے بتایا ہے کہ ملزم عمران کافی عرصے سے مسکان کو تنگ اور ہراساں کر رہا تھا اور ماضی میں بھی ایسا کر چکا تھا، جس کی وجہ سے واقعے کے فوری بعد سیدھا شک اسی پر گیا۔

ایڈیشنل ڈسٹرکٹ کمشنر آف پولیس (ڈی سی پی) ابھشیک گپتا نے صحافیوں کو بتایا کہ پولیس نے واقعے کا مقدمہ درج کر کے ملزم کی تلاش شروع کر دی ہے۔ جائے وقوعہ اور اطراف کے علاقے کی سی سی ٹی وی (CCTV) فوٹیج کا باریک بینی سے جائزہ لیا جا رہا ہے تاکہ ملزم کی نقل و حرکت کا سراغ لگایا جا سکے۔