عالمی منڈی میں خام تیل(Crude Oil) کی قیمتوں میں منگل کو معمولی اضافہ ریکارڈ کیا گیا، جبکہ سرمایہ کار اقوام متحدہ کی جنرل اسمبلی کے اجلاس کے دوران امریکا اور ایران کے درمیان ممکنہ مذاکرات سے متعلق پیش رفت کے منتظر ہیں۔

برینٹ خام تیل کے نومبر کے سودوں کی قیمت 22 سینٹ یا 0.22 فیصد اضافے سے 100.57 ڈالر فی بیرل ہوگئی۔ امریکی خام تیل ویسٹ ٹیکساس انٹرمیڈیٹ (ڈبلیو ٹی آئی) کے اکتوبر کے سودے، جن کی میعاد منگل کو ختم ہورہی ہے، 2 سینٹ یا 0.02 فیصد بڑھ کر 95.80 ڈالر فی بیرل ہوگئے۔ زیادہ فعال نومبر کے سودے 13 سینٹ یا 0.14 فیصد اضافے سے 92.49 ڈالر فی بیرل پر پہنچ گئے۔

ایران اور امریکا نے اتوار کو ایک دوسرے کو دھمکیاں دی تھیں، تاہم امریکی صدر ڈونلڈ ٹرمپ نے ایرانی صدر مسعود پزشکیان سے ملاقات پر آمادگی ظاہر کی ہے۔ مسعود پزشکیان کی اس ہفتے اقوام متحدہ کی جنرل اسمبلی کے اجلاس میں شرکت کے لیے نیویارک پہنچنے کی توقع ہے۔

مزیدپڑھیں:بلند شرح سود کی توقعات کا دباؤ، سونے کی قیمتوں میں اتار چڑھاؤ

کے سی ایم ٹریڈ کے چیف مارکیٹ اینالسٹ ٹم واٹرر نے کہا کہ ڈبلیو ٹی آئی میں اضافہ اور برینٹ کی مضبوط شروعات حالیہ گراوٹ کے بعد عارضی طور پر فروخت کی پوزیشنیں ختم کرنے کا نتیجہ دکھائی دیتی ہیں، نہ کہ بنیادی عوامل میں تبدیلی۔

انہوں نے کہا کہ امریکا اور ایران کے درمیان سفارتی کوششوں میں واضح پیش رفت یا ناکامی تک تیل کی قیمتیں محدود دائرے میں رہنے اور خبروں سے متاثر ہونے کا امکان ہے۔

ادھر مشرق وسطیٰ میں کشیدگی برقرار ہے۔ یمن کے حوثیوں نے ریاض اور سعودی آرامکو کی ینبع میں تنصیب پر حملوں کا دعویٰ کیا ہے۔ چین نے بھی تہران پر حوثیوں کے حملے روکنے میں مدد کے لیے دباؤ ڈالا ہے۔

دوسری جانب سعودی آرامکو نے آبنائے ہرمز کے ذریعے برآمدات بڑھا دی ہیں، جبکہ سعودی عرب کے شارقہ آئل فیلڈ میں پیداوار میں جزوی کمی کی بھی اطلاع سامنے آئی ہے۔