ایشین گیمز میں پاکستان نے والی بال میں قازقستان کو 1-3 سے شکست دے دی، جبکہ اسکواش کے ایونٹ میں مزید 2 تمغے ملنے کے بعد قومی دستے کے کانسی کے تمغوں کی کل تعداد 4 ہو گئی ہے۔

اوکازاکی چوو سوگو پارک جمنیزیم میں کھیلے گئے والی بال کے پول ’اے‘ کے افتتاحی میچ میں پاکستان نے تیسرا سیٹ ہارنے کے بعد شاندار کم بیک کیا۔ قومی ٹیم نے 16-25، 22-25، 25-17 اور 20-25 کے اسکور سے فتح اپنے نام کی۔

اس شاندار کامیابی میں مراد خان 21 پوائنٹس کے ساتھ نمایاں رہے، جن میں 17 کامیاب سپائیکس اور 4 بلاکس شامل تھے۔ ان کے علاوہ عثمان فریاد علی نے 14، جہان مراد نے 11 اور مصور خان نے 9 پوائنٹس کا حصہ ڈالا۔

ناگویا کنجو فوٹو ارینا میں کھیلے گئے مردوں کے سنگلز کے تیسری پوزیشن کے پلے آف میں نور زمان نے ہم وطن محمد عصب عرفان کو مسلسل 3 گیمز میں شکست دے دی۔ انہوں نے 26 منٹ تک جاری رہنے والے اس میچ میں 7-11، 7-11 اور 3-11 سے کامیابی حاصل کی۔

یہ نتیجہ تمغوں کی پوزیشن پر اثر انداز نہیں ہوا کیونکہ ہفتے کو سیمی فائنل ہارنے کے بعد دونوں کھلاڑیوں کا کانسی کا تمغہ پہلے ہی یقینی ہو چکا تھا۔نور زمان کو سیمی فائنل میں ملائیشیا کے این یو اینگ سے 0-3 سے شکست ہوئی تھی جبکہ عصب عرفان کو بھارت کے ابھے سنگھ نے ہرایا تھا۔

دونوں کھلاڑیوں کی سیمی فائنل تک رسائی نے 17 سال بعد انفرادی اسکواش کے مقابلوں میں پاکستان کی میڈل ٹیبل پر واپسی کو یقینی بنایا ہے۔

ان 2 کانسی کے تمغوں کے بعد پاکستان کے میڈلز کی مجموعی تعداد 4 ہو گئی ہے، جن میں خواتین کی کرکٹ ٹیم اور 60 کلوگرام ایم ایم اے ایونٹ میں عاصم خان کا جیتا ہوا کانسی کا تمغہ بھی شامل ہے۔

ایتھلیٹکس کے میدان میں پاکستان کے لیے ایک اچھی خبر انصار عباس کی صورت میں آئی، جنہوں نے 7.28 میٹر کی اپنی بہترین ذاتی چھلانگ لگا کر مردوں کے لانگ جمپ فائنل کے لیے کوالیفائی کر لیا ہے۔

کوالیفکیشن راؤنڈ میں ان کا ساتواں نمبر رہا جبکہ ازبکستان کے انور انوروف 8.00 میٹر کے ساتھ پہلے اور بھارت کے مرلی سری شنکر 7.84 میٹر کے ساتھ دوسرے نمبر پر رہے۔

اتوار کو شروع ہونے والی پاکستان کی ٹینس مہم کے نتائج ملے جلے رہے۔ مردوں کے ڈبلز کے پہلے راؤنڈ میں عقیل خان اور محمد شعیب نے منگولیا کی جوڑی کو باآسانی 2-6 اور 0-6 سے شکست دے دی۔ پاکستانی جوڑی نے شاندار کھیل پیش کرتے ہوئے حریف ٹیم کے 23 پوائنٹس کے مقابلے میں 54 پوائنٹس حاصل کیے۔

والی بال میں فتح کے ساتھ ہی پاکستان کی ہاکی اور کرکٹ ٹیمیں بھی اہم مقابلوں کی جانب بڑھ رہی ہیں۔ ایونٹ کا شاندار آغاز کرنے والی ہاکی ٹیم کو ہفتے کے روز ملائیشیا کے ہاتھوں 4-5 سے اپنی پہلی شکست کا سامنا کرنا پڑا۔ سیمی فائنل میں جگہ بنانے کے لیے اب پاکستانی ٹیم پیر کو عمان کے مدِ مقابل ہوگی۔

ایشین گیمز 2026 میں پاکستان اور ہانگ کانگ کی کرکٹ ٹیموں کے درمیان ہونے والا پہلا کوارٹر فائنل میچ بارش کے باعث منسوخ کردیا گیا۔جاپان کے شہر نیشّن کے کوروجی اسپورٹس پارک میں شیڈول پاکستان اور ہانگ کانگ کے میچ کا ٹاس بھی بارش کے باعث نہ ہوسکا۔

مزید پڑھیں:اوپن مارکیٹ، روپے کے مقابلے میں ڈالر کی قیمت میں کتنی کمی۔۔ ؟

مسلسل بارش کو دیکھتے ہوئے منتظمین نے میچ کو منسوخ کردیا، یوں پاکستان بہترین رینکنگ کی وجہ سے ایشین گیمز کے سیمی فائنل میں پہنچ گیا۔