عالمی منڈی میں بدھ کو سونے کی قیمت(Gold Rates) میں کمی ریکارڈ کی گئی، کیونکہ سرمایہ کار امریکی فیڈرل ریزرو کے ستمبر کے اجلاس کی روداد کے منتظر ہیں تاکہ یہ اندازہ لگایا جاسکے کہ مرکزی بینک کے حکام شرح سود میں مزید اضافے کے حق میں اب بھی ہیں یا نہیں۔
اسپاٹ گولڈ کی قیمت 0.3 فیصد کمی سے 4,150.23 ڈالر فی اونس ہوگئی، جبکہ امریکی گولڈ فیوچرز 0.2 فیصد گر کر 4,177.60 ڈالر فی اونس پر آگئے۔
فیڈرل اوپن مارکیٹ کمیٹی کے تازہ اجلاس کی روداد بدھ کو جاری کی جانی ہے۔ تجزیہ کار فرینک وال بام کے مطابق سونے کی قیمت نسبتاً مستحکم رہنے کے ساتھ معمولی کمی کے رجحان کا شکار ہوسکتی ہے۔ ان کے مطابق اجلاس کی روداد سے فیڈ کے آئندہ مالیاتی پالیسی کے مؤقف اور حکام میں مزید شرح سود بڑھانے کی حمایت کی سطح واضح ہوگی، جس سے آئندہ شرح سود میں اضافے کے امکانات متاثر ہوسکتے ہیں۔
انہوں نے کہا کہ مشرق وسطیٰ کی کسی بھی پیش رفت کے نتیجے میں طویل مدتی امریکی ٹریژری بانڈز کی شرح منافع، ڈالر یا تیل کی قیمتوں میں ہونے والی تبدیلیاں سونے کی سمت پر مزید اثر انداز ہوسکتی ہیں۔
مزید پڑھیں:تیل کی قیمتیں 101 ڈالرز فی بیرل سے تجاوز کر گئیں
فیڈ حکام کے حالیہ بیانات سے ظاہر ہوتا ہے کہ امریکی مرکزی بینک مہنگائی پر قابو پانے کے لیے پرعزم ہے۔ سان فرانسسکو فیڈ کی صدر میری ڈیلی نے کہا کہ مزید شرح سود میں اضافے کی ضرورت کا انحصار اس بات پر ہے کہ مہنگائی بڑھانے والے عوامل ختم ہوتے ہیں یا برقرار رہتے ہیں، جبکہ کنساس سٹی فیڈ کے صدر جیف شمڈ نے کہا کہ مہنگائی کم کرنے کے لیے شرح سود میں مزید اضافہ ضروری ہے۔
دریں اثنا، لندن بلین مارکیٹ ایسوسی ایشن کی کانفرنس میں شرکا نے پیش گوئی کی کہ سونے کی قیمت آئندہ 12 ماہ میں 5,013 ڈالر فی اونس تک پہنچ سکتی ہے۔
