بھارتی اداکارہ نیہا شرما نے مصنوعی ذہانت (AI) سے تیار کردہ ویڈیوز اور تصاویر میں اپنے چہرے کے غلط استعمال کے خلاف سخت مؤقف اختیار کیا ہے۔
بھارتی میڈیا کے مطابق اداکارہ نے سماجی رابطے کی ویب سائٹ ایکس پر لکھا کہ ‘جو کوئی بھی میری اجازت کے بغیراے آئی (AI) ٹیکنالوجی کا استعمال کرتے ہوئے میرے چہرے یا میری شبیہہ سے ویڈیوز یا تصاویر تیار کر رہا ہے، اسے خبردار کیا جاتا ہے کہ وہ فوراً ایسا کرنا بند کر دے’۔
انہوں نے یہ بھی لکھا کہ ‘جو مواد پہلے ہی پوسٹ کیا جا چکا ہے اسے ہٹا دیں اور میری شناخت کا استعمال کرتے ہوئے مزید کوئی بھی اے آئی ویڈیوز یا تصاویر بنانے، ایڈٹ کرنے یا پھیلانے سے باز رہیں ‘۔
Anyone using my face or likeness to create AI-generated videos or images without my consent is hereby warned to STOP IMMEDIATELY.
Take down all such content already posted and refrain from creating, editing, or circulating any further AI-generated videos or images using my…
— Neha Sharma (@Officialneha) October 17, 2026
نیہا شرما کے مطابق ‘میرے چہرے کو اس طرح استعمال کر کے مجھے غلط انداز میں پیش کرنا یا میری ساکھ کو نقصان پہنچانا ہرگز قبول نہیں کیا جائے گا ‘۔
اداکارہ نے مزید لکھا کہ ‘اسے ایک باضابطہ انتباہ سمجھیں، میں ایسے مواد کو تیار کرنے، پوسٹ کرنے یا پھیلانے کے ذمہ دار ہر فرد کے خلاف قانونی کارروائی کروں گی، کسی کو بھی یہ غلط فہمی نہیں ہونی چاہیے کہ وہ کسی جعلی اکاؤنٹ بنا کر یا اے آئی کا سہارا لے کر احتساب سے بچ سکتا ہے’۔
