امریکی فوج نے خلیج عمان میں ایک تجارتی بحری جہاز کو کارروائی کرتے ہوئے نشانہ بنا کر ناکارہ بنا دیا۔

امریکی فوج کا دعویٰ ہے کہ جہاز کے عملے نے متعدد بار دی جانے والی وارننگز نظر انداز کیں اور ایران پرعائد امریکی بحری ناکہ بندی کی خلاف ورزی کرنے کی کوشش کی۔

امریکی سینٹرل کمانڈ (سینٹکام) کی جانب سے جاری بیان کے مطابق امریکی فوج نے خلیج عمان میں کارروائی کرتے ہوئے سینٹ کٹس کے پرچم بردار کارگو جہاز ایم وی ہدیٰ کو نشانہ بنایا۔

سینٹکام کا کہنا ہے کہ جہاز کے سویلین عملے کو متعدد مرتبہ خبردارکیا گیا اور سمندری حدود سے نکلنے کی ہدایت کی گئی تاہم عملے نے امریکی فورسز کے احکامات پرعمل نہیں کیا۔

بیان کے مطابق امریکی فوجی طیارے نے کارگو جہاز کے پچھلے حصے پر گائیڈڈ گولہ بارود فائر کیا، جس کا مقصد جہاز کو ناکارہ بنانا تھا۔

امریکی حکام کے مطابق یہ کارروائی اس وقت کی گئی جب جہاز کے عملے نے بار بار دی جانے والی وارننگز کے باوجود امریکی ہدایات کو نظر انداز کیا۔

کارگو جہاز ایک ایرانی بندرگاہ کا دورہ کرنے کے بعد علاقائی پانیوں سے نکلنے کی کوشش کر رہا تھا، امریکی فوج نے اسے روکنے کے لئے کارروائی کی۔

واضح رہے کہ امریکی سینٹرل کمانڈ نے جولائی سے آبنائے ہرمز میں ایرانی بندرگاہوں پر سخت بحری ناکہ بندی نافذ کر رکھی ہے، جس کے تحت ایران آنے اور جانے والے تجارتی جہازوں کی نقل و حرکت محدود کرنے کے لیے اقدامات کیے جا رہے ہیں۔

مزید پرھیں:بطور کپتان کوشش ہوگی اچھا کھیلوں اور بہتر فیصلے کروں، بابر اعظم

سینٹکام کے مطابق اس فوجی مہم کے دوران امریکی فورسز اب تک 147 تجارتی جہازوں کا رخ تبدیل کروا چکی ہیں جبکہ امریکی احکامات اور وارننگز ماننے سے انکار کرنے والے 5 تجارتی جہازوں کو نشانہ بنا کر ناکارہ بنایا جا چکا ہے۔