مری(محمدارشدسے)سوسائٹی فار دی پروٹیکشن آف دی رائٹس آف چائلڈ (سپارک)کے زیراہتمام سیمینار سے خطاب کرتے ہوئےماہرین نے کہاکہ نکوٹین کی لت منشیات کے استعمال کی بہت سی دوسری اقسام کیلئےسیڑھی کاکام کرتی ہے۔ پاکستان میں جدید مصنوعات کےحوالے سے کوئی وفاقی یاصوبائی قانون سازی نہیں ہے،نکوٹین پاؤچز، ای سگریٹ اور تمباکوجیسی جدید مصنوعات پر پابندی لگانے کی ضرورت ہے، میڈیا پاکستانی نوجوانوں میں تمباکو کی جدید مصنوعات کو فروغ دینے کیلئےتمباکوکی صنعت کی دھوکہ دہی پر مبنی مہموں کا مقابلہ کرنے کے لیے ایک مضبوط کردار ادا کر سکتاہے۔ صحت کے کارکنوں اور سینئر صحافیوں نے نکوٹین پاؤچز، ای سگریٹ اورتمباکو جیسی جدید مصنوعات پرپابندی لگانے کی ضرورت کاجائزہ لیاکیونکہ وسیع اشتہارات اورتشہیری مہمات کیوجہ سے یہ مصنوعات پاکستانی نوجوانوں میں تیزی سے مقبول ہو رہی ہیں۔ڈاکٹر ضیاءالدین اسلام، کنٹری لیڈ وائٹل سٹریٹیجیز، ڈائرکٹر، تمباکو کنٹرول سیل، وزارت صحت، تمباکو کنٹرول پرڈبلیو ایچ اوکےفریم ورک کنونشن(ایف سی ٹی سی)کے سابق تیکنیکی فوکل پرسن نے ذکر کیا کہ پاکستان میں سگریٹ نوشی کرنےوالوں کی تعداد 29 ملین تک پہنچ چکی ہے،تمباکو کےاستعمال سےپاکستانیوں کی صحت پرسنگین اثرات مرتب ہورہے ہیں اورسالانہ ایک لاکھ ستر ہزار افراد تمباکو کے استعمال کی وجہ سے موت کے منہ میں چلےجاتے ہیں تمباکو کی صنعت نے عوام کی قیمت پرزیادہ منافع حاصل کرنےکیلئے ان جدید مصنوعات کو متعارف کرایا ہے۔ڈاکٹر ضیاءنے بتایا کہ پاکستان میں جدید مصنوعات کےحوالے سے کوئی وفاقی یاصوبائی قانون سازی نہیں ہے۔تمباکو نوشی کی ممانعت اور تمباکو نوشی نہ کرنےوالوں کے کا تحفظ آرڈیننس 2002 بچوں کو تمباکوکی مصنوعات کی تشہیر، تشہیراورفروخت کےحوالے سے اہم رہنما اصول فراہم کرتا ہے،اس طرح کے اقدامات جدید مصنوعات کیلئے بھی ضروری ہیں تاکہ انھیں بچوں اورنوجوانوں کی پہنچ سے دور رکھا جاسکے۔ اس موقع پر ملک عمران احمد، کنٹری ہیڈ، کمپین فارٹوبیکو فری کڈز نے بتایا کہ پالیسی سازی میں موجودخلا کو بروئےکار لاتے ہوئے، تمباکو انڈسٹری نے دھوکہ دہی کی مہم شروع کی ہےاوران سے فائدہ اٹھایا ہے،جدید مصنوعات سے براہ راست نوجوانوں کو نشانہ بنایا گیا ہےجیسا کہ مشہور موسیقاروں، اداکاروں اور ماڈلز کو بامعاوضہ سوشل میڈیا کمپین کیلئےاستعمال کیا جارہا ہے۔تمباکو کمپنی نے ایک میوزک شو بھی شروع کیا ہے، نوجوان صارفین کو راغب کرنےکے لیے جدیدمصنوعات تعلیمی اداروں، کھیل کے میدانوں اور ریستورانوں کے قریب فروخت کی جا رہی ہیں۔ عمران نے کہا کہ میڈیا کی وسیع اور غیرجانبدارانہ کوریج 3 سال بعد سگریٹ کی قیمتوں میں اضافے کی وجہ ہے جس سے ملک کو بےحد فائدہ ہوگا۔ میڈیا کو جدید مصنوعات کےحوالے سے بھی تمباکو کی صنعت کے ہتھکنڈوں کو بے نقاب کرنے میں اپنا کردار ادا کرنے کی ضرورت ہے۔ سپارک کے پروگرام مینیجر خلیل احمد ڈوگر نے کہا کہ61 ملین نوجوان ہمارے ملک کا اثاثہ ہیں، نکوٹین کی لت منشیات کے استعمال کی بہت سی دوسری اقسام کیلئے سیڑھی کاکام کرتی ہے اورنوجوانوں میں صحت اور ذہنی صحت کے سنگین مسائل کا سبب بن سکتی ہے،ایسی خطرناک مصنوعات کی پاکستان جیسے ملک میں کوئی گنجائش نہیں ہونی چاہیے،ہم جدید مصنوعات کے عادی ہونے کے مزید متحمل نہیں ہو سکتے۔خلیل احمد ڈوگر نے پاکستان میں بچوں کے حقوق کے تمام اشاریوں میں بہتری کیلئےمیڈیا کے کردار کو سراہااور میڈیاسے درخواست کی کہ وہ اس مسئلے کو بچوں کےحقوق کے مسئلے کےطورپر لے۔انہوں نے ایڈیٹرز اور سینئر صحافیوں پر زور دیا کہ وہ پاکستان میں ابھرتی ہوئی مصنوعات کو پھیلانےکیلئےتمباکو کی صنعت کےاشتہارات، فروخت اور پروموشنل ہتھکنڈوں کے بارے میں تحقیقاتی رپورٹس جاری کریں۔سی ای او کرومیٹک ٹرسٹ شارق محمود خان نے بتایا کہ تمباکو کمپنیاں تقریباً تمام سوشل میڈیا پلیٹ فارمز پرآن لائن مہمات میں بھاری رقم لگا رہی ہیں۔اشتہارات کے الگورتھم اس دھوکے سے بنائے گئے ہیں کہ اشتہارات ان مضامین پر بھی نظر آتے ہیں جوتمباکو سے لوگوں کی حوصلہ شکنی کیلئےلکھےجاتے ہیں۔ شارق محمود نے میڈیا ویب سائٹس پر زوردیا کہ وہ ان اشتہارات کو ہٹا دیں اورنیکوٹین کے نقصانات، سیکنڈ ہینڈ سگریٹ نوشی اور تمباکو کی مصنوعات کےعوامی معیشت اور ماحول پر پڑنےوالے منفی اثرات کے بارے میں شعور بیدار کریں۔