کوئٹہ (ممتاز نیوز )سابق چیف جسٹس بلوچستان ہائی کورٹ اور سابق چیف جسٹس محمد نور مسکانزئی کی شہادت پر عدالت عالیہ بلوچستان ، ہائی کورٹ سرکٹ بنچز ، تمام ضلعی اور ماتحت عدالتوں میں قومی پرچم سرنگوں رہے گا ۔ رجسٹرار بلوچستان ہائی کورٹ کی طرف سے واقعہ پر تین روزہ سوگ کا اعلان بھی کیا گیا ہے ۔ چیف جسٹس بلوچستان ہائی کورٹ جسٹس نعیم اختر افغان ، سپریم کورٹ کے سینئیر جج جسٹس قاضی فائز عیسیٰ ، کمانڈر 12 کور لیفٹیننٹ جنرل آصف غفور ، سابق کور کمانڈر اور وفاقی وزیر عبدل قادر بلوچ ، جج صاحبان ، سینئیر وکلا اور عمائدین جسٹس مسکانزئی کی شہادت پر تعزیت کیلئے مسکانزئی ہاؤس خاران پہنچے اور مغفرت کیلئے دعا کی ۔ جسٹس مسکانزئی 14 اکتوبر کو دہشتگرد حملہ میں شہید ہوئے تھے ۔ وکلا تنظیموں کی طرف بھی واقعہ پر تین روزہ سوگ کا اعلان کیا گیا ہے ۔ محمد نور مسکانزئی 2014 سے 2018 تک عدالت عالیہ بلوچستان کے 18 ویں چیف جسٹس رہے ۔ جسٹس نور مسکانزئی فیڈرل شریعت کورٹ کے 17 ویں چیف جسٹس بھی تھے ۔ جسٹس مسکانزئی کو آبائی علاقہ مسکان قلات خاران میں سپرد خاک کیا گیا ۔