بالی ووڈ کے سٹار ورون دھون نے انکشاف کیا ہے کہ وہ ٹینس سٹار ثانیہ مرزا کے عشق میں گرفتار تھے اس پر انہیں ثانیہ کی والدہ نے جھاڑ بھی پلائی تھی۔

اپنے ایک حالیہ انٹرویو میں ورون دھون نے کہا یہ اس وقت کی بات ہے جب میں ایک پروڈکشن کمپنی کے ساتھ ایک اشتہار پر کام کر رہا تھا۔ یہ اشتہار ثانیہ پر شوٹ کیا جارہا تھا اور ثانیہ مجھے بے حد پسند تھیں۔ ہمیں شوٹ کیلئے300 جوتوں کی ضرورت تھی جن کو لانے کیلئے مجھے بھیجا گیا۔ انہوں نے بتایا کہ ثانیہ نے مجھ سے ایک سیب لانے کی بھی گزارش کی۔ چنانچہ جوتوں کے ساتھ ساتھ سیب کا بھی بندوبست ہوگیا۔ ورون نے مزید بتایا کہ جب میں سیب دینے گیا تو وہاں ثانیہ کی والدہ سے سامنا ہوا، میں نے انہیں سیب دینا چاہا مگر وہ ڈانتے ہوئے پوچھنے لگیں کہ تمہیں یہ سیب لانے کو کس نے کہا تھا ؟ تب ثانیہ مرزا نے میری جان بچائی اور بتایا کہ سیب انہوں نے منگوایا ہے۔ تاہم بعد میں مجھے جوتوں اور سیب کیلئے5000 روپے بھی دیئے گئے۔