پشاور(سپورٹس رپورٹر)خیبرپختونخوا سکواش ایسوسی ایشن نے سال 2023 ء کے سالانہ مقابلوں کے شیڈول کا اعلان کردیا‘ گزشتہ روز پشاور سپورٹس کمپلیکس میں واقع کے پی سپورٹس رائٹرز میڈیا سینٹر میں خیبرپختونخوا سکواش ایسوسی ایشن کے چیئرمین‘سابق ورلڈ چیمپئن و سکواش لیجنڈ قمرزمان نے باقاعدہ طور پر سالانہ کیلنڈر پیش کر دیا جو پاکستان سکواش فیڈریشن سے منظور کردہ ہے‘ اس سلسلے میں سکواش لیجنڈ قمرزمان نے کہا کہ ہر سال کی طرح اس سال بھی زیادہ سے زیادہ ٹورنامنٹس کرانے کی کوشش کریں گے اس سلسلے میں تیار کردہ کیلنڈر کے مطابق مجموعی طور پر 24 ٹورنامنٹس کرائیں گے جس میں 12 قومی اور 12 صوبائی سطح کے مقابلے شامل ہیں‘ کیلنڈر میں شامل 24 میں سے 22 مقابلے پشاور میں ہونگے‘شیڈول کے مطابق 23 جنوری سے 26 جنوری تک آل پاکستان جونیئر بوائز سکواش چیمپئن شپ پشاور میں ہوگی اس کی انعامی رقم دو لاکھ روپے ہوگی جس کے لئے دس روزہ ٹریننگ کیمپ پہلے لگایا جائے گا‘13 سے 17 فروری تک آل پاکستان سینئر مینز سکواش چیمپئن شپ پشاور میں ہوگی جس کی انعامی رقم ڈیڑھ لاکھ روپے رکھی گئی ہے اور اس کے لئے پندرہ روزہ ٹریننگ کیمپ لگایا جائے گا پندرہ سے اٹھارہ مارچ تک آل پاکستان سینئر ویمنز سکواش چیمپئن شپ منعقد ہوگی جس کی انعامی رقم ایک لاکھ روپے ہوگی اور اس کے لئے دس روزہ ٹریننگ کیمپ ہوگا‘ چوبیس سے اٹھائیس مئی تک آل پاکستان جونیئر سکواش چیمپئن شپ ہوگی جس کی انعامی رقم دو لاکھ روپے اور دس روزہ ٹریننگ کیمپ لگایا جائے گا‘چھ سے گیارہ جون تک آل پاکستان جونیئر سکواش چیمپئن شپ ہوگی جس کی انعامی رقم دو لاکھ روپے اور پندرہ روزہ ٹریننگ کیمپ ہوگا‘ آٹھ سے تیرہ اگست تک آل پاکستان جونیئر بوائز سکواش چیمپئن شپ منعقد ہوگی جس کی انعامی رقم تین لاکھ روپے اور پندرہ روزہ ٹریننگ کیمپ ہوگا‘بارہ سے سترہ ستمبر تک آل پاکستان جونیئر سکواش چیمپئن شپ ایبٹ آباد میں ہوگی جس کے لئے پندرہ روزہ ٹریننگ کیمپ ہوگا دس سے چودہ اکتوبر تک آل پاکستان ویمنز سینئر سکواش چیمپئن شپ ہوگی جس کی انعامی رقم ڈیڑھ لاکھ روپے اور دس روزہ ٹریننگ کیمپ لگایا جائیگا‘ چودہ سے اٹھارہ نومبر تک پی ایس اے انٹرنیشنل مینز سینئر سکواش چیمپئن شپ پشاور میں ہوگی جس کی انعامی رقم تین ہزار ڈالر رکھی گئی ہے جس کے لئے بیس روزہ ٹریننگ کیمپ ہوگا جبکہ بارہ سے سترہ دسمبر تک آل پاکستان جونیئر سکواش چیمپئن شپ ہوگی جس کی انعامی رقم تین لاکھ روپے اور پندرہ روزہ ٹریننگ کیمپ ہوگا‘ بارہ سے پندرہ جنوری تک کے پی بوائز سکواش چیمپئن شپ منعقد کی جاچکی ہے جس کی انعامی رقم ساٹھ ہزار روپے تھی اور اس کے لئے دس روزہ کیمپ بھی لگایا گیا‘ پانچ سے آٹھ فروری تک کے پی جونیئر سکواش چیمپئن شپ‘اکیس سے ستائیس مارچ تک کے پی جونیئر گرلز سکواش چیمپئن شپ‘اپریل اور مئی میں ایک ماہ کا ٹریننگ کیمپ اور ایج گروپ کے کھلاڑیوں کے درمیان مقابلے ہوں گے‘چودہ سے سترہ جون تک انٹر سکولز بوائز و گرلز سکواش چیمپئن شپ ہوگی‘ اٹھائیس سے تیس جون تک کے پی جونیئر بوائز سکواش چیمپئن شپ‘چودہ سے سولہ جولائی تک کے پی جونیئر بوائز و گرلز سکواش چیمپئن شپ‘گیارہ سے چودہ اگست تک کے پی مینز سینئر سکواش چیمپئن شپ‘ بائیس سے ستائیس ستمبر تک کے پی سینئر سکواش چیمپئن شپ پشاور میں ہوگی چوبیس سے انتیس اکتوبر تک انٹر ڈسٹرکٹ بوائز انڈر21 سکواش ٹورنامنٹ ایبٹ آباد میں ہوگا‘ اٹھارہ سے بائیس نومبر تک کے پی جونیئر بوائز سکوشا چیمپئن شپ جبکہ پانچ سے دس دسمبر تک کے پی ویمنز سینئر سکواش چیمپئن شپ کا انعقاد کیا جائے گا ان کے لئے کیمپ بھی منعقد ہوں گے اور تمام مقابلوں کے لئے انعامی رقوم مختص کی گئی ہیں‘سکواش لیجنڈ قمرزمان نے میڈیا کو بتایا کہ جونیئرز پر زیادہ فوکس کیا گیا ہے ساتھ گرلز کھلاڑیوں کو بھی مواقع دے رہے ہیں ہم نے سکولوں کے دورے کرکے کھلاڑیوں کا انتخاب کیا اس لئے انٹر سکولز کے مقابلے رکھے گئے ہیں خوشی ہے کہ تعلیمی اداروں میں سکواش کورٹس تعمیر کئے جارہے ہیں اچھے کھلاڑی آگے آئیں گے پی اے ایف سکواش اکیڈمی میں سکواش کے کھلاڑیوں کو بہترین سہولتیں فراہم کی جارہی ہیں قمرزمان سکواش کمپلیکس سمیت دیگر کورٹس میں بھی کھلاڑیوں کو مواقع مل رہے ہیں سٹی سے آنیوالے کھلاڑیوں کودشواریوں کا سامنا ہے لہذا پشاور شہر میں موزوں جگہ پر سکواش کمپلیکس کی تعمیر ناگزیر ہے‘ انہوں نے کہا کہ کھلاڑی اب موبائل کے چیمپئن ہیں رات دو بجے تک موبائل دیکھنے والا کھلاڑی صبح اٹھ کر پریکٹس کیسے کرسکتا ہے ہمارا کوئی کھلاڑی ٹاپ رینکنگ میں نہیں ہیں قصور وار کھلاڑی ہی ہیں سابق ادوار میں سہولتیں نہیں ہوتی تھیں اب سہولتیں موجود ہیں مگر کھلاڑی مطلوبہ محنت نہیں کرتے ٹیلنٹ کی کوئی کمی نہیں‘ پشاور کیساتھ آٹھ سے دس ٹورنامنٹس ایبٹ آباد‘ دو مانسہرہ‘ دو ہری پور‘دو کوہاٹ‘ دو بنوں‘دو چارسدہ اور دو مردان میں کروائیں گے‘ اچھے کھلاڑی کچھ ٹورنامنٹس کھیل کر پیسہ کمانے کے لئے بیرون ممالک چلے جاتے ہیں ہم سکواش میں کھویا ہوا مقام دوبارہ حاصل کرسکتے ہیں مگر اس کے لئے کھلاڑیوں کو فزیکل ٹریننگ کیساتھ ڈائٹ‘اور کورٹس ٹریننگ کرنا ہوگی۔