20 سالہ شانداراسپورٹس کیریئر سے ہزاروں لوگوں کو متاثر کرنے والی سابق بھارتی  ٹینس اسٹار ثانیہ مرزا کو ’ اسپورٹس اسٹار ایسز  انسپریشنل آئیکون ایوارڈ ‘ دے دیا گیا۔

ثانیہ مرزا نے ممبئی میں منعقدہ ایک تقریب میں سابق بھارتی کھلاڑی سنیل گواسکر سے انسپریشنل آئیکون ایوارڈ وصول کیا۔

ایوارڈ کے بعد اپنے جذبات کا اظہار کرتے ہوئے ثانیہ کا کہنا تھا کہ آج اس ایوارڈ کیلئے یہاں میری موجودگی قابل فخر ہے، پچھلے 2  ماہ میرے لیے خاصے جذباتی رہے ہیں جس دوران بہت سے واقعات پیش آئے اور بہت سے فیصلے لیے گئے۔

ثانیہ نے اسپورٹس اسٹار میگزین کے سرورق کا حصہ بننے پر بھی خوشی کا اظہار کیا اور کہا کہ میں جب بھی بچپن میں یہ میگزین پڑھتی تھی تو میگزین کا سرورق دیکھ کر اپنی تصویر بھی یہاں لگنے کی خواہش کرتی تھی۔

اپنے 20 سالہ کیریئر پر گفتگو کرتے ہوئے ثانیہ نے کہا کہ ان بیس سالوں کے دوران اچھے برے وقت میں سب میرے ساتھ رہے لیکن یہ اچھا وقت ہمیشہ ساتھ نہیں چلتا ، میرے لیے یہ اعزاز کی بات ہے کہ مجھے اپنے لیے، اپنی فیملی اور اپنے ملک کیلئے کھیلنے کا موقع ملا، سنیل گواسکر جیسی شخصیت کے ہاتھوں یہ ایوارڈ لینا بھی میرے لیےکسی اعزاز سے کم نہیں اور کوئی بھی تحفہ اس انعام سے بڑھ کر نہیں ہوسکتا۔