واشنگٹن: سابق امریکی صدر ڈونلڈ ٹرمپ نے یہودیوں کے کنوینشن سے خطاب میں اس عزم کا اظہار کیا کہ دوبارہ منتخب ہونے پر وہ مسلمانوں پر سفری پابندیاں عائد کریں گے۔
فرانسیسی خبر رساں ادارے کے مطابق ڈونلڈ ٹرمپ نے ریپبلکن یہودی اتحاد کی سالانہ کانفرنس سے خطاب میں کہا کہ ’ہم انتہا پسند اسلامی دہشت گردوں کو اپنے ملک سے باہر رکھیں گے۔
سال 2017 میں ڈونلڈ ٹرمپ نے صدر کا عہدہ سنبھالنے کے بعد چند مسلمان ممالک سے آنے والوں پر سفری پابندیاں عائد کر دی تھیں جن میں ایران، لیبیا، صومالیہ، شام، یمن، عراق اور سوڈان شامل تھے۔
ڈونلڈ ٹرمپ کے یہ احکامات امتیازی سلوک کی بنیاد پر فوراً ہی عدالت میں چیلنج کر دیے گئے تھے تاہم ان کا یہ مؤقف امیگریشن کی مخالفت کرنے والوں کے نظریے کے ساتھ موافقت رکھتا ہے۔
سال 2021 میں صدر جو بائیڈن نے صدارتی منصب سنبھالنے کے بعد یہ احکامات واپس لے لیے تھے۔
ریاست نیواڈا کے شہر لاس ویگس میں منعقد ہونے والی ریپبلکن یہودی اتحاد کی کانفرنس میں ڈونلڈ ٹرمپ کے علاوہ ان کی جماعت کے دیگر عہدیدار بھی موجود تھے جنہوں نےحماس کے خلاف جنگ میں اپنی غیرمتزلزل حمایت کی یقین دہانی کرائی۔
ٹرمپ نے مزید کہا کہ وہ اپنے دوست اور اتحادی ملک اسرائیل کا اس طرح دفاع کریں گے جیسے پہلے کسی نے نہیں کیا۔
سابق صدر کا کہنا تھا کہ اسرائیل اور حماس کے درمیان تنازع اسی طرح ہے جیسے ’مہذب اور وحشی کے درمیان لڑائی، جیسے شائستگی اور بدکاری کے درمیان، جیسے اچھائی اور برائی کے درمیان لڑائی ہو۔
کانفرنس کے دیگر شرکا نے امریکہ کے کالجوں میں یہود مخالف جذبات کی طرف توجہ دلاتے ہوئے ایسی یونیورسٹیوں کی فنڈنگ روکنے کی تجویز دی اور فلسطینی حامی غیرملکی طلبہ کے ویزے منسوخ کرنے کا کہا۔