اسلام آباد(مانیٹرنگ ڈیسک) خیبرپختونخوا میں ہزارہ ڈویژن کے علاقے ہری پور سے تعلق رکھنے والے نامور کامیڈین کو چچا زاد بھائی نے قتل کیا۔
تفصیلات کے مطابق کامیڈین عرفان حیدر کسی تعارف کا محتاج نہیں، وہ اپنے فن کے ماہر سمجھے جاتے تھے اور خاص طور پر خیبرپختونخوا کے ہزارہ ڈویژن میں کامیڈین عرفان حیدر کو بہت شہرت حاصل تھی۔
ہری پور کے رہائشی نامور کامیڈین عرفان حیدر کو کسی واردات میں نہیں بلکہ اپنے سگے چچا زاد بھائی نے قتل کیا، ان کے درمیان معمولی سی بات پر جھگڑا شروع ہوا اور بعد ازاں یہ گھریلو جھگڑا کامیڈین عرفان حیدر کی زندگی کے خاتمے پر ختم ہوا۔
مقامی پولیس کا کہنا ہے کہ کامیڈین عرفان حیدر کو جھگڑے کے دوران چچا زاد بھائی نے کسی نوک دار چیز سے وار کرکے قتل کیا اور ہمیں اہل خانہ کے ذریعے واقعہ کی اطلاع دی گئی تو پولیس نے فوراً موقع پر پہنچ کر تفتیش شروع کی۔
پولیس اور ریسکیو حکام نے کامیڈین عرفان حیدر کی لاش کو پوسٹ مارٹم کے لیے آر ایچ سی کوٹ نجیب اللہ اسپتال منتقل کردیا ہے جہاں پوسٹ مارٹم کے بعد لاش لواحقین کے حوالے کردی۔ آخری اطلاعات تک واقعے کا مقدمہ درج نہیں کیا گیا اور نہ ہی ملزم کی گرفتاری عمل میں آئی ہے۔
