بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

کراچی: آرمی چیف کا عالمی دفاعی نمائش آئیڈیاز 2024 کا دورہ، غیرملکی فوجی حکام سے تبادلہ خیال

آرمی چیف  جنرل سیّد عاصم منیر نے کراچی ایکسپو سینٹر میں جاری عالمی دفاعی نمائش اور سیمینار آئیڈیاز 2024 کا دورہ کیا۔ جہاں پاکستان کا جدید ترین ڈرون شاہپر تھری توجہ کا مرکز بن گیا۔
فوج کے شعبہ تعلقات عامہ (آئی ایس پی آر) کے مطابق آرمی چیف نے دورے کے دوران دوست ممالک کے دفاعی مینوفیکچررز کی فعال شرکت کو سراہا۔
آئی ایس پی آر نے بتایا کہ نمائش میں کل 557 نمائش کنندگان شرکت کررہے ہیں جن میں سے 333 بین الاقوامی نمائش کنندگان ہیں جبکہ 224 ملکی نمائش کنندگان ہیں۔ اس کے علاوہ 36 ممالک نے نمائش کنندگان کے اسٹالز لگائے جن میں سے 17 ممالک پہلی بار شرکت کررہے ہیں۔
آئی ایس پی آر کے مطابق تقریب میں 53 ممالک کے 300 سے زیادہ غیرملکی مندوبین نے شرکت کی اور نمائش اور پاکستان کی دفاعی صنعت پر مکمل اعتماد کا اظہار کیا۔
آئی ایس پی آر کے مطابق آرمی چیف نے نمائش کے دوران تقریب میں موجود غیر ملکی فوجی حکام اور دفاعی مندوبین کے ساتھ بامعنی بات چیت بھی کی۔
اس موقع کی ایک اہم بات گلوبل انڈسٹریل ڈیفنس سلوشنز (GIDS) پاکستان کی طرف سے تیار کردہ جدید ترین ڈرون (UAV) ”Shahpar-III“ (شاہپر تھری) کا افتتاح تھا۔
شاہپر تھری اعلیٰ درجے کی صلاحیتوں کا حامل ڈرون ہے، جو 35,000 فٹ کی آپریشنل اونچائی پر پرواز کی صلاحیت رکھتا ہے اور 24 گھنٹے سے زیادہ پرواز کرسکتا ہے۔ یہ ڈرون بموں، میزائلوں اور ٹارپیڈو سمیت وسیع پیمانے پر گولہ بارود لے جانے کی صلاحیت رکھتا ہے۔
آئی ایس پی آر کے مطابق آئیڈیاز 2024 کا 12 واں ایڈیشن 19 نومبر کو شروع ہوا اور 22 نومبر 2024 کو اختتام پذیر ہوگا۔
قبل ازیں کراچی پہنچنے پر کور کمانڈر کراچی لیفٹیننٹ جنرل بابر افتخار نے آرمی چیف جنرل عاصم منیر کا پُرتپاک استقبال کیا۔