اسلام آباد(نیوز ڈیسک) وفاقی وزیر اطلاعات و نشریات عطا اللہ تارڑ اور وفاقی وزیر داخلہ محسن نقوی کے درمیان اہم ملاقات ہوئی جس میں باہمی دلچسپی کے امور، ملک میں امن و امان کی مجموعی صورتحال اور میڈیا کے مثبت کردار پر تفصیلی تبادلہ خیال کیا گیا۔
ملاقات کے دوران دونوں وزراء نے ریاستی بیانیے کو مضبوط بنانے، عوام کا ریاستی اداروں پر اعتماد بحال رکھنے اور سوشل میڈیا پر گمراہ کن معلومات کے پھیلاؤ کے تدارک کے لیے مربوط حکمت عملی اپنانے پر اتفاق کیا۔
وفاقی وزیر اطلاعات عطا اللہ تارڑ نے واضح کیا کہ ملکی سالمیت، قومی اداروں کے وقار اور سماجی ہم آہنگی کے خلاف کسی بھی منفی پروپیگنڈے کو ہرگز برداشت نہیں کیا جائے گا۔ انہوں نے زور دیا کہ میڈیا کو قومی بیانیے کی تقویت اور سچائی کے فروغ میں اہم کردار ادا کرنا ہوگا۔
وزیر داخلہ محسن نقوی نے امن و امان کے قیام اور دہشت گردی کے خلاف جاری اقدامات میں میڈیا کے تعمیری کردار کو سراہتے ہوئے کہا کہ میڈیا نے مشکل حالات میں ہمیشہ ذمہ داری کا مظاہرہ کیا ہے۔
ملاقات میں دونوں وزراء نے اس بات پر بھی زور دیا کہ قومی مفاد کے تحت ادارہ جاتی ہم آہنگی کو مزید فروغ دینا وقت کی اہم ضرورت ہے تاکہ داخلی استحکام کو یقینی بنایا جا سکے اور ملک دشمن عناصر کی سازشوں کا مؤثر جواب دیا جا سکے۔
