اسلام آباد :وزیراعظم محمد شہباز شریف نے ملک بھر میں حالیہ بارشوں اور سیلابی صورتحال کے باعث ہونے والے جانی و مالی نقصانات پر گہرے دکھ اور افسوس کا اظہار کیا ہے۔وزیراعظم نے سیلاب اور مختلف حادثات میں جاں بحق ہونے والے افراد کے درجات کی بلندی کے لیے دعا کی اور ان کے اہل خانہ سے دلی ہمدردی اور تعزیت کا اظہار کیا۔ انہوں نے حادثات میں زخمی ہونے والوں کو فوری اور مکمل طبی امداد فراہم کرنے کی ہدایت بھی جاری کی۔وزیراعظم نے متعلقہ اداروں کو ہنگامی بنیادوں پر ریسکیو اور ریلیف آپریشنز کو تیز تر کرنے کی ہدایت دیتے ہوئے کہا کہ متاثرہ عوام تک فوری امداد پہنچائی جائے اور آنے والے دنوں میں کسی بھی ممکنہ ہنگامی صورتحال سے نمٹنے کے لیے تمام تر تیاریاں مکمل رکھی جائیں۔انہوں نے نیشنل ڈیزاسٹر مینجمنٹ اتھارٹی (این ڈی ایم اے) کو صوبائی حکومتوں اور متعلقہ محکموں سے قریبی رابطے میں رہنے اور تمام ضروری سہولیات مہیا کرنے کی ہدایت کی۔وزیراعظم نے نیشنل ہائی وے اتھارٹی (NHA) اور فرنٹیئر ورکس آرگنائزیشن (FWO) کو بھی ہدایت کی کہ سیلاب سے متاثرہ شاہراہوں اور رابطہ سڑکوں کی بحالی کا کام فوری طور پر مکمل کیا جائے تاکہ ٹریفک کی روانی بحال ہو سکے اور امدادی کاموں میں کوئی رکاوٹ نہ آئے۔