قاہرہ: مصر کے معروف اداکار اور سینماٹوگرافر تیمورافسوسناک حادثے میں زندگی کی بازی ہار گئے۔ وہ اس وقت اپنے بیٹے کی جان بچانے کی کوشش میں سمندر کی بے رحم لہروں کی نذر ہو گئے۔

عرب میڈیا کے مطابق تیمور اپنے اہل خانہ کے ساتھ راس الحکمہ کے شمالی ساحل پر پکنک منا رہے تھے، جب اچانک ان کا بیٹا سمندر کی بلند اور خطرناک لہروں میں پھنس گیا۔ ایک باپ کی فطری تڑپ نے تیمور کو لمحے بھر میں فیصلہ لینے پر مجبور کر دیا۔ وہ فوراً پانی میں کود پڑے تاکہ اپنے بیٹے کو بچا سکیں۔
تیمور نے بڑی ہمت اور حوصلے سے موجوں کا مقابلہ کیا، اور بالآخر اپنے بیٹے تک پہنچنے میں کامیاب ہو گئے۔ انہوں نے اسے زندگی کی طرف لوٹا دیا — لیکن خود واپس نہ آ سکے۔
یہ واقعہ صرف ایک حادثہ نہیں بلکہ قربانی، محبت اور والد کی بے مثال فداکاری کی داستان بن گیا۔
تیمور کی اس ناگہانی موت پر مصر کی شوبز انڈسٹری غم میں ڈوب گئی۔ سوشل میڈیا پر ان کے مداحوں اور ساتھی فنکاروں نے ان کی یاد میں دکھ بھرے پیغامات شیئر کیے۔
اداکارہ یاسمین عبدالعزیز نے انسٹاگرام پر لکھا اللہ کے سوا کوئی معبود نہیں۔ تیمور ایک نرم دل، بہادر اور نیک انسان تھے۔ میری دعا ہے کہ اللہ ان پر رحم فرمائے اور ان کے خاندان کو یہ صدمہ برداشت کرنے کا حوصلہ دے۔
اداکار اور قریبی دوست حسام داغر نے فیس بک پر روتے ہوئے الفاظ میں لکھا ایک باپ اپنے بیٹے کو بچاتے ہوئے اپنی جان دے گیا۔ یہ تکلیف ناقابلِ بیان ہے۔ میرے آنسو نہیں رک رہے۔ اللہ انہیں شہادت کا درجہ دے۔ وہ ایک سچے ہیرو کی موت مرے۔
مصری فنکاروں کی نمائندہ تنظیم  سندیکٹ آف آرٹسٹک پروفیشنز نے تیمور کے انتقال پر گہرے دکھ کا اظہار کرتے ہوئے کہا کہ وہ مصری ڈرامے اور سینماٹوگرافی کا ایک درخشاں ستارہ تھے، جن کا خلا آسانی سے پُر نہیں ہو سکے گا۔