بھارتی فلم اور ٹی وی انڈسٹری کی مشہور اداکارہ آشا شرما 88 برس کی عمر میں انتقال کر گئیں، ان کے انتقال کی تصدیق سین اینڈ ٹی وی آرٹسٹ ایسوسی ایشن  نے سوشل میڈیا پلیٹ فارم ‘ایکس پر کی۔ ادارے نے آشا شرما کے اہل خانہ سے دلی تعزیت کا اظہار کیا ہے۔
اداکارہ کی موت کی وجہ فوری طور پر سامنے نہیں آ سکی، تاہم ان کے انتقال کی خبر نے فلمی دنیا میں افسردگی کی لہر دوڑا دی ہے۔

 ماں اور دادی کے لازوال کرداروں کی پہچان
آشا شرما نے اپنی طویل اداکاری کے کیریئر میں سینکڑوں فلموں اور ڈراموں میں کام کیا، لیکن جو چیز انہیں لوگوں کے دلوں میں زندہ رکھے گی وہ ان کے وہ کردار ہیں جو انہوں نے ایک ماں یا دادی کے طور پر ادا کیے۔ ان کی پرفارمنس میں ایک قدرتی اپنائیت اور جذبات کی گہرائی ہوتی تھی، جو ناظرین کے دلوں کو چھو لیتی تھی۔
ٹی وی سیریل مکم بھاگیہ میں ان کا دادی کا کردار خاص طور پر یادگار رہا، جس میں ان کی محبت بھری، رہنمائی کرتی شخصیت نے بے شمار مداحوں کے دل جیتے۔
 فلمی دنیا میں ایک طویل اور کامیاب سفر 
آشا شرما نے کئی مشہور فلموں میں اپنی اداکاری کا لوہا منوایا، جن میں ‘انصاف کون کرے گا’، ‘پیار تو ہونا ہی تھا’، ‘ہم کو تم سے پیار ہے’، ‘ہم تمہارے ہیں صنم’ اور  ‘مجھے کچھ کہنا ہے’  جیسی فلمیں شامل ہیں۔ انہوں نے دھرمیندر، ہیما مالنی، اجے دیوگن اور کاجول جیسے بڑے ستاروں کے ساتھ اسکرین شیئر کی۔

 ان کی آخری فلم آدی پورش  تھی، جس میں وہ پربھاس اور کریتی سینن کے ساتھ نظر آئیں۔ آشا شرما صرف ایک اداکارہ نہیں تھیں، وہ انڈین سینما کی اُن چہروں میں سے تھیں جنہوں نے ناظرین کے دلوں میں اپنائیت، شفقت اور محبت کے جذبات جگائے۔ ان کی کمی طویل عرصے تک محسوس کی جائے گی۔