دنیا بھر میں کھلاڑیوں کو ممنوعہ ادویات کے استعمال پر نہ صرف تمغوں سے ہاتھ دھونا پڑتا ہے بلکہ ساکھ بھی داؤ پر لگتی ہے، لیکن اب ایک نیا اور متنازعہ قدم دنیا کے سامنے آ رہا ہے۔
مئی 2026 میں لاس ویگاس میں ہونے والے’’اِنہینسڈ گیمز‘‘ میںکارکردگی بڑھانے والی ادویات کے استعمال کی نہ صرف اجازت ہوگی بلکہ اس کی حوصلہ افزا بھی کی جائے گی۔
یہ ایونٹ آسٹریلوی بزنس مین ’’ایرون ڈیسوزا‘‘ کا منصوبہ ہے، جن کا ماننا ہے کہ کھلاڑیوں کو اپنے جسم پر مکمل کنٹرول ہونا چاہیے۔ اس منصوبے کوڈونلڈ ٹرمپ جونیئر اور ارب پتی پیٹر تھیل کی حمایت حاصل ہے۔
ان مقابلوں میں ڈوپ ٹیسٹنگ کا کوئی تصور نہیں ہوگا۔ معروف برطانوی اولمپیئن تیراک ’’بین پراؤڈ‘‘ بھی اس میں حصہ لینے کا اعلان کر چکے ہیں، جن کا کہنا ہے کہ وہ ایک میچ جیت کر اتنی کمائی کریں گے جتنی وہ 13 سال میں میڈلز جیت کر بھی نہیں کر سکے۔
تاہم اس ایونٹ کو عالمی سطح پر سخت تنقید کا سامنا ہے۔ورلڈ ایتھلیٹکس کے سربراہ نے اسے ’’بیوقوفی‘‘ قرار دیا، جبکہ ورلڈ اینٹی ڈوپنگ ایجنسی (WADA)نے اسے ’’خطرناک اور غیرذمہ دارانہ‘‘ کہا ہے۔
جہاں کچھ اسے کھیلوں کی ’’آزادی‘‘ کا نیا باب کہہ رہے ہیں، وہیں ناقدین اسے کھلاڑیوں کی صحت کے ساتھ کھلواڑ قرار دے رہے ہیں۔