ہانگ کانگ(شِنہوا) چین کے صدر شی جن پھنگ نے کہا ہے کہ حقائق نے ’’ایک ملک، دو نظام ‘‘ کی عظیم طاقت کو ثابت کیا ہے ،اگر ہم ثابت قدمی کے ساتھ آگے بڑھیں گے تو ایک روشن مستقبل ہمارا منتظر ہوگا۔ گزشتہ روز چینی صدر جو کمیونسٹ پارٹی آف چائنہ کی مرکزی کمیٹی کے جنرل سیکرٹری اور مرکزی فوجی کمیشن کے چیئرمین بھی ہیں ہانگ کانگ کی مادر وطن واپسی کی 25ویں سالگرہ کی تقریبات میں شرکت کے سلسلے میں ٹرین کے ذریعے ہانگ کانگ پہنچے ۔ایچ کے ایس اے آرکی چیف ایگزیکٹو کیری لیم اوران کے خاوندلیم سیو پور نے ویسٹ کولون ہائی سپیڈ ریل اسٹیشن پرصدر شی اوران کی اہلیہ پھینگ لی یوآن کا استقبال کیا۔ استقبالیہ تقریب میں ہانگ کانگ کے سینکڑوں نوجوانوں اورعام لوگوں نے جھنڈے اور پھول لہرائے جن میں ہانگ کانگ پولیس بینڈ اور شیر ڈانس کی پرفارمنس کا مظاہرہ کیا گیا۔ صدر نے ہانگ کانگ کے ہم وطنوں کو مبارکباد دی اور ہانگ کانگ کی مادر وطن واپسی کی 25 ویں سالگرہ کے موقع پر نیک خواہشات کا اظہار کیا۔ چینی صدر کا کہنا تھا کہ ایک وقت میں ہانگ کانگ نے سخت آزمائشوں کا مقابلہ کرتے ہوئے کئی خطرات اورچیلنجز پر قابو پایا،اس کے بعد سے ہانگ کانگ مضبوط بن کر ابھرا ہے اوراس نے بڑی طاقت کا مظاہرہ کیا ہے۔ انہوں نے کہاکہ حقائق نے’’ ایک ملک، دو نظام‘‘ کی عظیم طاقت کو ثابت کیا ہے جو ہانگ کانگ کی طویل مدتی خوشحالی اور استحکام کی ضمانت فراہم کرنے کے ساتھ ہانگ کانگ کے ہم وطنوں کی فلاح و بہبود کو یقینی بناتا ہے۔انہوں نے کہاکہ جب تک ’’ایک ملک، دو نظام‘‘ کو غیر متزلزل طریقے سے برقرار رکھا جائے گا، ہانگ کانگ کا مستقبل یقینی طور پراس سے بھی زیادہ روشن ہوگا اوراس کی چینی قوم کی عظیم ترتجدید میں زیادہ سے زیادہ شراکت ہوگی۔ صدر شی(آج) یکم جولائی کو ہانگ کانگ کی مادر وطن واپسی کی 25ویں سالگرہ اور ہانگ کانگ خصوصی انتظامی خطے ( ایچ کے ایس اے آر)کی چھٹی مدت کی حکومت کی افتتاحی تقریب میں شرکت کریں گے۔صدرشی ایچ کے ایس اے آر کا معائنہ بھی کریں گے۔