میئر کراچی مرتضیٰ وہاب نے شہر کی بار بار ٹوٹنے والی جہانگیر روڈ کو دو ماہ میں تعمیر مکمل کرنے کا اعلان کر دیا ہے۔
کراچی میں پریس کانفرنس کرتے ہوئے مرتضیٰ وہاب نے تاخیر کا شکار ترقیاتی منصوبوں پر بات کرتے ہوئے کہا کہ یونیورسٹی روڈ سے متعلق مسائل جولائی تک حل کر دیے جائیں گے جبکہ کریم آباد انڈر پاس کو بھی جلد مکمل کیا جائے گا۔ انہوں نے اب تک ہونے والی تاخیر پر شہریوں سے معذرت کرتے ہوئے کہا کہ غلطیاں تسلیم کیے بغیر بحیثیت قوم آگے نہیں بڑھا جا سکتا۔
میئر کراچی نے بتایا کہ منور چورنگی انڈر پاس جون میں مکمل ہو جائے گا اور شہر کی ترقی کے لیے مجموعی طور پر 46 ارب روپے خرچ کیے جائیں گے۔ ان منصوبوں میں نئے پارکس، اربن فارسٹ اور قبرستانوں کی تعمیر شامل ہے، جبکہ قبرستانوں کے لیے زمین وزیراعلیٰ کی جانب سے فراہم کی جائے گی۔
مرتضیٰ وہاب کا کہنا تھا کہ منفی پروپیگنڈا کرنے والے دراصل شہر کے ساتھ دشمنی کر رہے ہیں، کیونکہ اس طرح کا رویہ کسی فرد نہیں بلکہ پورے کراچی کو نقصان پہنچاتا ہے۔
انہوں نے یہ بھی کہا کہ کراچی انسٹی ٹیوٹ آف ہارٹ ڈیزیز اور نیشنل انسٹی ٹیوٹ آف کارڈیو ویسکولر ڈیزیز کے درمیان شراکت داری کے لیے حکومت کو آمادہ کر لیا گیا تھا، تاہم بعض عناصر کی مخالفت کے باعث یہ کام رک گیا۔