پاکستان تحریک انصاف (پی ٹی آئی) کے بانی رکن حامد خان نے کہا ہے کہ آئین کو 26ویں آئینی ترمیم کے ذریعے قتل اور 27ویں ترمیم کے ذریعے دفن کر دیا گیا۔
لاہور ہائیکورٹ میں پروفیشنل گروپ کی پریس کانفرنس کے دوران حامد خان نے کہا کہ ملک پر ایک ناجائز حکومت مسلط کی گئی، اور ان اسمبلیوں نے آئین میں ایسی ترامیم کیں جس کا وہ اختیار نہیں رکھتیں تھیں۔ ان کا کہنا تھا کہ صوبائی اور وفاقی حکومتیں دھاندلی زدہ انتخابات کے ذریعے قائم کی گئیں۔
حامد خان نے مزید کہا کہ جو لوگ سیاسی طور پر آواز بلند کرنے کی کوشش کر رہے ہیں، ان کی زبان بندی کی جا رہی ہے، اور ملک میں جو جبر اور زیادتی ہو رہی ہے وہ اب تک کم ہی دیکھی گئی ہے۔
انہوں نے دعا کی کہ نیا سال خوش آئند ہو، کیونکہ 2025 اور اس سے پہلے کے سال ملک کے لیے انتہائی مشکل اور بھیانک ثابت ہوئے۔
حامد خان نے یہ بھی کہا کہ ان کی دونوں بار ایسوسی ایشنز نے اس معاملے میں لیڈنگ رول ادا کیا، جبکہ دوسرا گروپ اب حکومتی گروپ بن چکا ہے اور ان ترامیم کے لیے اس کے رہنماؤں کا ہاتھ بھی ہے۔ عدلیہ کے خلاف اقدامات کے خلاف مزاحمت کا زیادہ بوجھ پروفیشنل گروپ پر ہے، اور آئندہ منتخب صدور اس معاملے کو آگے لے کر جائیں گے۔
انہوں نے کہا کہ ملک میں آئین و قانون کی بالادستی خطرے میں ہے، اور جب بھی آئینی اداروں کے ساتھ کوئی چھیڑ چھاڑ ہوئی، ان کے وکلاء آگے آئے۔ امید ہے کہ آئندہ وکلاء اسٹیبلشمنٹ کی بی ٹیم نہ بنیں۔
پی ٹی آئی رہنما نے یہ بھی کہا کہ اسلام آباد ہائیکورٹ کے صدر ان کی پسند کے مطابق منتخب تھے، لیکن اندازہ نہیں تھا کہ اسٹیبلشمنٹ پیسے کے استعمال سے اس عمل میں دخل دے گی۔