اسلام آباد (طارق محمود سمیر) — بلوچ ٹریننگ وِنگ کوئٹہ میں سولجرز کے بنیادی فوجی تربیتی کورس کے اکیسویں بیج کی پروقار پاسنگ آؤٹ پریڈ کا انعقاد کیا گیا۔ اس تقریب میں بلوچستان کے مختلف اضلاع سے تعلق رکھنے والے 170 جوانوں نے کامیابی سے اپنی تربیت مکمل کی اور پاکستان فوج میں شمولیت اختیار کی۔
بلوچ رجمنٹ سینٹر کے کمانڈنٹ نے اس تقریب میں مہمانِ خصوصی کے طور پر شرکت کی اور پاسنگ آؤٹ پریڈ کے اختتام پر جوانوں اور ان کے اہل خانہ کو مبارکباد پیش کی۔ تربیتی کورس کے دوران غیر معمولی کارکردگی دکھانے والے جوانوں کو انعامات سے نوازا گیا۔
پاسنگ آؤٹ ہونے والے جوانوں نے اس موقع پر اپنے خیالات کا اظہار کرتے ہوئے کہا کہ، “بلوچ نوجوانوں کو یہ پیغام دینا چاہتا ہوں کہ وہ فوج میں بھرتی ہو کر پاکستان کا دفاع کریں۔” انہوں نے مزید کہا، ٹریننگ کے دوران پیش آنے والے مختلف چیلنجز نے میری کامیابی میں اہم کردار ادا کیا۔” ایک جوان نے اپنی ٹریننگ کا تجربہ بیان کرتے ہوئے کہا، “آج میں نے چھ ماہ کی ٹریننگ مکمل کی، جس میں ہمیں جسمانی اور ذہنی تربیت دونوں سے گزارا گیا۔”
یہ پروگرام نہ صرف جوانوں کی محنت اور عزم کی علامت تھا بلکہ پاکستان کی فوجی تربیت کے معیار کو بھی اجاگر کرتا ہے۔