لاہور:(نیوزڈیسک) گورنر پنجاب سردار سلیم حیدر خان سے گورنر ہاؤس لاہور میں سید داود علی گیلانی کی قیادت میں وفد نے ملاقات کی۔ ملاقات کے دوران مختلف سیاسی جماعتوں سے تعلق رکھنے والے سرگرم سیاسی کارکنوں نے پاکستان پیپلز پارٹی میں باضابطہ شمولیت اختیار کرنے کا اعلان کیا۔
اس موقع پر گورنر پنجاب سردار سلیم حیدر خان نے پیپلز پارٹی میں شمولیت اختیار کرنے والے ساتھیوں کا خیر مقدم کرتے ہوئے کہا کہ مختلف جماعتوں کے کارکنوں اور رہنماؤں کا پیپلز پارٹی کی قیادت پر اعتماد کا اظہار خوش آئند ہے۔ انہوں نے کہا کہ ملک میں امن، استحکام اور ترقی کے لیے تمام سیاسی قوتوں کو مل کر کام کرنے کی ضرورت ہے۔
گورنر پنجاب کا کہنا تھا کہ پاکستان پیپلز پارٹی اداروں کی مضبوطی، آئین اور قانون کی بالادستی پر یقین رکھتی ہے اور پارٹی نے ہمیشہ عوام کی فلاح و بہبود کے لیے عملی اقدامات کیے ہیں۔ انہوں نے واضح کیا کہ گورنر ہاؤس کے دروازے عوام کے لیے کھلے ہیں اور عوامی مسائل کے حل کے لیے ہر ممکن تعاون فراہم کیا جائے گا۔
