بالی ووڈ کی مشہور گلوکارہ نیہا ککڑ کے سوشل میڈیا پر مبہم پیغام کے بعد ان کی شادی کے حوالے سے قیاس آرائیاں زور پکڑ گئیں، لیکن اب نیہا نے اس موضوع پر واضح موقف اپناتے ہوئے خبروں کی سختی سے تردید کی ہے۔
نیہا نے انسٹاگرام اسٹوریز میں لکھا کہ لوگ ان کے ’’معصوم شوہر‘‘ اور ’’سب سے پیارے خاندان‘‘ کو اس معاملے میں گھسیٹنے سے باز رہیں، کیونکہ یہی لوگ ہیں جن کی محبت اور حمایت نے انہیں آج اس مقام تک پہنچایا ہے۔ انہوں نے وضاحت کی کہ وہ کچھ دوسرے نظام یا حالات سے ناخوش ہیں، نہ کہ اپنی ازدواجی زندگی سے۔
گلوکارہ نے مزید کہا کہ انہیں سوشل میڈیا پر جذباتی انداز میں بات کرنے سے گریز کرنا چاہیے تھا، کیونکہ میڈیا بعض اوقات چھوٹی بات کو بڑھا چڑھا کر پیش کر دیتا ہے۔ اس تجربے سے انہوں نے سبق حاصل کیا ہے اور آئندہ اپنی ذاتی زندگی پر کھل کر گفتگو نہیں کریں گی۔
نیہا نے اپنے پیغام کے آخر میں مداحوں سے محبت کا اظہار کیا، خود کو جذباتی قرار دیتے ہوئے یقین دلایا کہ وہ جلد ہی نئے جوش اور توانائی کے ساتھ واپس آئیں گی۔ ساتھ ہی انہوں نے کہا کہ انہیں غلط سمجھا گیا اور اس پر معذرت بھی کی۔
واضح رہے کہ اس سے قبل نیہا نے ایک پوسٹ میں اعلان کیا تھا کہ وہ ذمہ داریوں، تعلقات اور کام سے وقتی وقفہ لے رہی ہیں اور فوٹوگرافروں اور مداحوں سے درخواست کی تھی کہ ان کی پرائیویسی کا احترام کیا جائے۔ تاہم یہ پوسٹ بعد ازاں حذف کر دی گئی، جس کے بعد طلاق سے متعلق افواہیں گردش کرنے لگیں۔