آئی سی سی ٹی ٹوئنٹی ورلڈکپ کے پانچویں میچ میں انگلینڈ نے نیپال کو محض 4 رنز کے فرق سے شکست دی۔
میچ ممبئی کے وانکھیڈے اسٹیڈیم میں کھیلا گیا، جہاں انگلینڈ نے 7 وکٹ پر 184 رنز بنائے اور نیپال کو جیت کے لیے 185 رنز کا ہدف دیا۔ نیپال کے روہت پاؤڈیل اور دیپیندر سنگھ آئری نے انگلینڈ کے خلاف 82 رنز کی شراکت قائم کر کے میچ کو سنسنی خیز بنا دیا۔
دونوں بلے بازوں نے عادل رشید کی گیندوں پر جارحانہ بیٹنگ کرتے ہوئے بڑے شاٹس کھیلے اور نیپال کو مضبوط پوزیشن میں پہنچایا۔ تاہم سیم کرن کی آف کٹر پر دیپیندر سنگھ آئری کیچ آؤٹ ہو گئے، اور کچھ ہی دیر بعد روہت پاؤڈیل بھی لیام ڈاسن کی گیند پر کیچ آؤٹ ہو گئے۔ ان دو اہم وکٹوں کے گرنے سے نیپال شدید دباؤ میں آ گیا۔
میچ کے آخری اوورز میں نیپال کو کم وقت میں زیادہ رنز درکار تھے، لیکن نئی بیٹنگ جوڑی ہدف کے تعاقب کو مکمل نہیں کر سکی، جس کے نتیجے میں انگلینڈ نے محض 4 رنز سے کامیابی حاصل کی۔