ترجمان اوگرا عمران غزنوی کے مطابق،آئل اینڈ گیس ریگولیٹری اتھارٹی (اوگرا) نے پنجاب انفارمیشن ٹیکنالوجی بورڈ (پی آئی ٹی بی) کے اشتراک سے اپنے ڈیجیٹل پلیٹ فارم پر آئل انڈسٹری کے لیے جامع تربیتی سیشن کا انعقاد کیا۔ یہ اقدام ملک میں پیٹرولیم مصنوعات کے ٹریک اینڈ ٹریس نظام کے نفاذ کی جانب ایک اہم قدم ہے۔
اسلام آباد میں اوگرا ہیڈ آفس میں منعقدہ اس سیشن میں 200 سے زائد نمائندگان نے شرکت کی، جبکہ ایک بڑی تعداد آن لائن بھی شامل رہی۔ تقریب میں اوگرا اور پی آئی ٹی بی کے سینئر حکام بھی موجود تھے۔
تربیت کا مقصد اوگرا کے ڈیجیٹل پلیٹ فارم کے مؤثر استعمال سے متعلق آگاہی دینا تھا، جس سے ملک کے آئل سپلائی چین کو مکمل طور پر ڈیجیٹل بنانے میں مدد ملے گی۔ اس نظام میں درآمد و برآمد، پیداوار اور اسٹاک رپورٹنگ، سیلز اور ترسیل کی نگرانی، اور ریفائنریز سے ریٹیل آؤٹ لیٹس تک حقیقی وقت میں ڈیٹا انضمام شامل ہے۔
چیئرمین اوگرا، شہزاد اقبال نے افتتاحی خطاب میں کہا کہ ڈیجیٹل نظام شفافیت، کارکردگی اور پیٹرولیم مصنوعات کی نقل و حرکت کی مؤثر نگرانی میں کلیدی کردار ادا کرے گا، اور ریگولیٹری نظام اور سروس ڈیلیوری کو بھی بہتر بنائے گا۔
پی آئی ٹی بی کے ماہرین نے مختلف ماڈیولز پر تفصیلی بریفنگ دی، اور شرکاء نے سوالات اور تجاویز پیش کیں، جن کے جوابات اوگرا اور پی آئی ٹی بی کی ٹیموں نے دیے۔
اوگرا نے آئل سیکٹر میں ٹیکنالوجی پر مبنی اصلاحات اور اسٹیک ہولڈرز کے ساتھ مؤثر تعاون کے عزم کا اعادہ کیا۔