قومی اسمبلی میں اپوزیشن لیڈر محمود خان اچکزئی نے کہا ہے کہ ملک کی تمام سیاسی جماعتیں مل بیٹھیں اور ایک قومی حکومت تشکیل دیں۔
یہ بات انہوں نے پشتونخوا ملی عوامی پارٹی کے زیر اہتمام پشین کے سردار مصطفی ترین اسٹیڈیم میں جلسے سے خطاب کے دوران کہی، جس میں وزیراعلیٰ خیبر پختونخوا سہیل آفریدی اور دیگر سیاسی قائدین بھی موجود تھے۔
محمود اچکزئی نے کہا کہ رمضان کے مہینے میں امریکا اور اسرائیل نے ایران پر بلاوجہ حملے کیے، اور پاکستان کا اپوزیشن اتحاد ایران کے ساتھ کھڑا ہے۔ انہوں نے زور دیا کہ اس وقت ملک کے تمام اسٹیک ہولڈرز کو مل بیٹھنے کی ضرورت ہے۔
اپوزیشن لیڈر نے تمام سیاسی جماعتوں، بشمول مولانا فضل الرحمان، پیپلز پارٹی، ن لیگ اور دیگر سے اپیل کی کہ وہ ملکی مفاد میں اس معاملے پر متفق ہوں۔ انہوں نے کہا کہ فوج اور قومی اداروں کے بغیر ملک کا دفاع ممکن نہیں، اور یہ ہماری فوج ہے جو ملک کی حفاظت کر رہی ہے۔
جلسے سے خطاب میں وزیر اعلیٰ خیبر پختونخوا سہیل آفریدی نے بلوچستان میں رات گئے پی ٹی آئی کے سینکڑوں کارکنان کی گرفتاریوں کی نشاندہی کی۔ ان کا کہنا تھا کہ چمن، پشین اور کوئٹہ میں پارٹی کارکنان کے گھروں پر چھاپے مارے گئے، اور وزیر اعلیٰ بلوچستان کو چاہیے کہ فوری طور پر انہیں رہا کروائیں۔