دبئی میں سونے کی قیمتوں(Gold Rates) میں ایک بار پھر اضافہ ریکارڈ کیا گیا ہے، جس کے بعد گزشتہ روز ہونے والی کمی جزوی طور پر ختم ہو گئی۔ مارکیٹ ذرائع کے مطابق قیمتی دھاتوں کی عالمی طلب اور جغرافیائی سیاسی صورتحال کے باعث قیمتوں میں اتار چڑھاؤ جاری ہے۔

تازہ اعداد و شمار کے مطابق 24 قیراط سونا 544.25 درہم فی گرام پر ٹریڈ کر رہا ہے، جو پیر کے اختتام پر 539.75 درہم فی گرام تھا۔ اسی طرح 22 قیراط سونے کی قیمت بھی بڑھ کر 504 درہم فی گرام ہو گئی ہے، جبکہ ایک روز قبل اس میں نمایاں کمی ریکارڈ کی گئی تھی۔

دیگر اقسام میں 21 قیراط سونا 483.25 درہم، 18 قیراط 414.25 درہم اور 14 قیراط سونا 323 درہم فی گرام کی سطح پر ٹریڈ کر رہا ہے۔ مارکیٹ ماہرین کے مطابق قیمتی دھاتوں کی قیمتوں میں یہ اتار چڑھاؤ عالمی معاشی غیر یقینی صورتحال کا نتیجہ ہے۔

عالمی مارکیٹ میں اسپاٹ گولڈ 4,517 ڈالر فی اونس سے اوپر برقرار رہا جبکہ چاندی کی قیمت میں بھی تقریباً ایک فیصد اضافہ دیکھا گیا، جس کے بعد یہ 75.8 ڈالر فی اونس تک پہنچ گئی۔

مزیدپڑھیں:صدر مملکت کی اٹلی کی قیادت کو یومِ جمہوریہ پر مبارکباد

 سرمایہ کار اس وقت مشرق وسطیٰ میں جاری کشیدگی، خصوصاً حزب اللہ اور اسرائیل کے درمیان صورتحال اور ایران سے متعلق مذاکرات پر گہری نظر رکھے ہوئے ہیں۔ اس کے علاوہ امریکا کی روزگار سے متعلق اہم رپورٹ (نان فارم پے رولز) کا بھی انتظار کیا جا رہا ہے، جو مستقبل میں شرح سود اور عالمی مالیاتی منڈیوں کے رجحان پر اثر انداز ہو سکتی ہے۔

 عالمی سطح پر غیر یقینی حالات کے باعث سرمایہ کار محفوظ سرمایہ کاری یعنی سونے اور چاندی کی طرف رجحان بڑھا رہے ہیں، جس سے قیمتوں میں اتار چڑھاؤ مزید جاری رہنے کا امکان ہے۔