مدینہ منورۃ (امیر محمد خان) سرکاری سکیم کے تحت عازمین حج کی قومی ائیر لائن کی پہلی پروازPK-773 کراچی سے316 عازمین کو لے کر مدینہ منورہ پہنچ گئی،ائیرپورٹ پر ڈی جی حج عبدالوہاب سومرو اور ڈائریکٹر حج مدینہ ضیا الرحمٰن نے وزارت مذہبی امور کے حکام کے ہمراہ عازمین کااستقبال کیا، مدینہ انٹرنیشنل ائیر پورٹ پر اس حوالے سے استقبالیہ تقریب منعقد کی گئی۔
تقریب سے خطاب کرتے ہو ئے عبدالوہاب سومرو نے کہا کہ اللہ تعالیٰ نے آپ سب کو سعادت دی اور تمام عازمین حج سے ملتمس ہوں کہ اللہ کے بابرکت گھر جا کر پاکستان کی سالمیت اور استحکام اور امن کے لیےخصوصی دعا کریں۔
تقریب سے ڈائریکٹرحج مدینہ نے کہا کہ حاجی کیمپ اور دیگر اداروں نے مل کر کوشش کی ہے کہ سرکاری سکیم کے تحت حج کرنے والوں کے لیے بہترین انتظامات کیے جائیں اور زیادہ سے زیادہ سہولیات فراہم کی جائیں انہوں نے کہا کہ عازمین سعودی قوانین کا احترام کریں اور اپنے اپنے گروپ کے ساتھ رہیں۔ اس موقع پر عازمین میں تحائف تقسیم کیے ۔ عازمین کیلئے مدینہ میں ٹرانسپورٹ کے بہترین انتظامات کیے گئے۔