متحدہ عرب امارات (یو اے ای) نے غزہ کے اسپتال پر اسرائیلی حملے کی شدید مذمت کی ہے۔

اماراتی وزارتِ خارجہ نے جانی نقصان پر گہرے دکھ اور متاثرین کے اہلِ خانہ سے تعزیت کا اظہار کیا ہے۔

ایک بیان میں اماراتی وزارتِ خارجہ نے کہا ہے کہ شہریوں اور شہری اداروں کو نشانہ نہ بنایا جائے، بین الاقوامی معاہدوں کے مطابق شہریوں کے تحفظ کو یقینی بنایا جائے۔

یو اے ای نے عالمی برادری سے مطالبہ کرتے ہوئے کہا ہے کہ فوری جنگ بندی تک پہنچنے کے لیے کوششیں تیز کی جائیں۔

اسپتال پر بمباری
واضح رہے کہ غزہ کے الاہلی اسپتال پر اسرائیلی طیاروں نے بمباری کی ہے جس کے نتیجے میں 500 سے زائد فلسطینی شہید ہوگئے ہیں، بمباری سے اسپتال کی عمارت مکمل طور پر تباہ ہوگئی ہے۔

فلسطینی وزارت صحت کے مطابق اسرائیلی طیاروں نے وسطی غزہ میں موجود اسپتال کو نشانہ بنایا جس میں 600 سے زائد افراد زخمی بھی ہوئے ہیں۔

7 اکتوبر سے اسرائیلی جارحیت جاری
فلسطینی حکام کے مطابق غزہ میں 7 اکتوبر سے جاری اسرائیلی جارحیت میں شہید فلسطینیوں کی تعداد 3 ہزار 500 سے تجاوز کر گئی ہے۔

فسلطینی وزارت صحت کا کہنا ہے کہ غزہ میں اسرائیلی حملوں سے 12 ہزار 500 افراد زخمی ہوئے ہیں، شہید ہونے والوں میں 1000 سے زائد بچے اور ہزار سے زائد خواتین شامل ہیں۔