نئ دہلی(مانیٹرنگ ڈیسک) بھارت میں ہندوانتہا پسندوں نے تاریخی بابری مسجد کو شہید اور اس کی جگہ پر رام مندر بنانے میں کامیابی کے بعد اب ایک اور تاریخی مسجد کو بھی شہید کرنے کے مذموم منصوبے پر کام شروع کردیا ۔
انتہا پسند ہندووں نے تاریخی گیان واپی مسجد میں پوجا کی اجازت دیئے جانے کا مطالبہ کیا اور ان کی درخواست پر بنارس کی ایک عدالت نے گزشتہ دنوں مسجد کے اندر سروے کا حکم دیا تھا۔ مسلمانوں نے سروے روکنے کے لئے سپریم کورٹ میں درخواست دائر کی ہے لیکن بھارتی عدالت عظمیٰ نے سروے روکنے کا حکم صادر کرنے سے انکار کر دیا ۔
میڈیا رپورٹس میں بتایا گیا کہ اس سروے کے تحت تاریخی گیان واپی مسجد کے اندر ویڈیو گرافی کا سلسلہ جاری ہے،مسجد کی اسّی فیصد ویڈیو گرافی پوری ہو چکی ہے ۔ گیان واپی مسجد کی ویڈیو گرافی کے لئے سخت حفاظتی انتظامات کئے گئے ہیں۔