نائب وزیراعظم و وزیر خارجہ پاکستان سینیٹر اسحاق ڈار اور سعودی وزیر خارجہ فیصل بن فرحان نے مشرق وسطیٰ کی صورتحال پر گہری تشویش کا اظہار کرتے ہوئے غزہ میں فوری جنگ بندی کا مطالبہ کیا ہے۔
ترجمان دفتر خارجہ کے مطابق اسحاق ڈار کی سعودی عرب کے وزیر خارجہ سے ملاقات ہوئی ہے جس میں پاکستان میں اقتصادی تعاون اور سعودی سرمایہ کاری کو مزید بڑھانے کے عزم کا اعادہ کیا گیا۔
اسحاق ڈار نے سعودی وزیر خارجہ شہزادہ فیصل بن فرحان آل سعود سے گیمبیا کے شہر بنجول میں 15ویں او آئی سی اسلامی سربراہی کانفرنس کے موقع پر ملاقات کی۔
ترجمان نے بتایا کہ پاکستان اور سعودی عرب کے درمیان دیرینہ اسٹریٹجک اور اقتصادی تعلقات کی اہمیت کا ذکر کرتے ہوئے نائب وزیراعظم اور سعودی وزیر خارجہ نے پاکستان میں اقتصادی تعاون اور سعودی سرمایہ کاری کو مزید بڑھانے کے عزم کا اعادہ کیا۔
نائب وزیراعظم اور وزیر خارجہ نے سعودی عرب کے ’وژن 2030‘ کی تعریف کی، جس کا مقصد 21 ویں صدی میں مملکت کی سماجی و اقتصادی تبدیلی ہے۔
انہوں نے کہاکہ حال ہی میں سعودی وزیر خارجہ کا وفد کے ہمراہ دورہ اسلام آباد پاکستان اور مملکت کے درمیان اقتصادی تعاون میں ایک نئی رفتار کی نمائندگی کرتا ہے۔
نائب وزیراعظم اور سعودی وزیر خارجہ نے مشرق وسطیٰ میں حالیہ پیشرفت پر گہری تشویش کا اظہار کرتے ہوئے غزہ میں فوری جنگ بندی کا مطالبہ کیا۔
انہوں نے فلسطین اور کشمیر کے حالات سمیت امت مسلمہ کے مسائل پر اسلامی تعاون تنظیم (او آئی سی) کے اہم کردار پر بھی تبادلہ خیال کیا۔
