اسلام آباد (نیوز ڈیسک)وفاقی وزیر برائے امور کشمیر گلگت بلتستان و سیفران انجینئر امیر مقام نے کہا ہے کہ پاکستان کشمیری عوام کے حق خودارادیت کے حصول کی منصفانہ جدوجہد کی مکمل اخلاقی، سیاسی اور سفارتی حمایت جاری رکھے گا،کشمیری عوام جبر اور سازشوں کے باوجود اپنے حق خود ارادیت کے حصول کےلئے اپنی جدوجہد میں ثابت قدم ہیں،سلامتی کونسل کی قراردادوں میں درج حق خودارادیت کا استعمال کرنے کے قابل بنانے کے لئے اقدامات کرے۔ ان خیالات کا اظہار انہوں نے یوم یکجہتی کشمیر کے حوالے سے اپنے پیغام میں کیا۔ انہوں نے کہا کہ ہر سال پانچ فروری کو یوم یکجہتی کشمیر کے طور پر منایا جاتا ہے تاکہ کشمیری عوام کی حق خودارادیت کے حصول کی جدوجہد کی حمایت کی جا سکے۔
جموں و کشمیر پر اقوام متحدہ کی سلامتی کونسل کی قراردادیں منصفانہ اور غیر جانبدارانہ رائے شماری کے ذریعے کشمیری عوام کے اپنے مستقبل کا فیصلہ کرنے کے حق کی توثیق کرتی ہیں تاہم بھارت نے گزشتہ 77 سالوں کے دوران بھارتی غیر قانونی طور پر جموں و کشمیر کے لوگوں کو یہ حق دینے سے انکار کر دیا ہے۔انجینئر امیرمقام نے کہا کہ بھارت جموں و کشمیر پر اپنے قبضے کو غیر قانونی طور پر مستحکم کرنے کے لیے مختلف اقدامات کر رہا ہےجو ایک بین الاقوامی طور پر تسلیم شدہ متنازعہ علاقہ ہے۔وفاقی وزیر نے کہا کہ 5 اگست 2019 کے اپنے غیر قانونی اور یکطرفہ اقدامات کے بعد بھارت کشمیری عوام کو انسانی حقوق کی منظم خلاف ورزیوں کا نشانہ بھی بنا رہا ہے، اس نے میں اختلاف رائے کو کچلنے کے لئے خوف کا ماحول بنایا ہے۔
– Advertisement –
انہوں نے کہا کہ کشمیری عوام جبر اور سازشوں کے باوجود اپنے حق خود ارادیت کے حصول کے لئے اپنی جدوجہد میں ثابت قدم ہیں جن کی ہمت اور قربانیوں کو زبردست خراج تحسین پیش کرتا ہوں۔ انہوں نے کہا کہ کشمیریوں کو ان کے حق خودارادیت سے محروم کر کے بھارت نے جنوبی ایشیا کے لوگوں کی پے در پے نسلوں کو بہتر مستقبل کے مواقع سے بھی محروم کر دیا ہے، خطے میں پائیدار امن کے حصول کے لئے جموں و کشمیر کے تنازع کو سلامتی کونسل کی متعلقہ قراردادوں کے مطابق اور کشمیری عوام کی امنگوں کے مطابق حل کیا جانا چاہیے۔
وفاقی وزیر نے کہا کہ اب وقت آ گیا ہے کہ عالمی برادری بالخصوص اقوام متحدہ اپنے وعدوں پر عمل کرے اور جموں و کشمیر کے عوام کو اقوام متحدہ کی سلامتی کونسل کی قراردادوں میں درج حق خودارادیت کا استعمال کرنے کے قابل بنانے کے لیے اقدامات کرے۔ عالمی برادری کو انسانی حقوق کی خلاف ورزیوں کو روکنے اور کشمیری عوام کے بنیادی حقوق اور آزادیوں کی بحالی کا بھی مطالبہ کرنا چاہیے۔ انہوں نے کہا کہ پاکستان کشمیری عوام کے حق خودارادیت کے حصول کی منصفانہ جدوجہد کی اپنی مکمل اخلاقی، سیاسی اور سفارتی حمایت جاری رکھے گا۔