گلوکار و اداکار علی ظفر نے لاہور میں دھماکے سنے جانے کی اطلاع اپنے ایکس اکاؤنٹ پر جاری کی۔
انہوں نے لکھا کہ ’ہم نے ابھی اپنے گھر سے دھماکوں کی آوازیں سنی ہیں۔اُن لوگوں سے جو جنگ کے نعرے لگا رہے ہیں، تشدد کا جشن منا رہے ہیں، اور مزید تصادم کو ہوا دے رہے ہیں کیا آپ واقعی سمجھتے ہیں کہ دو ایٹمی طاقتوں کے درمیان جنگ کا مطلب کیا ہو سکتا ہے؟‘
علی ظفر نے کہا کہ ’یہ کوئی فلم نہیں ہے۔ جنگ تباہی ہے۔ معصوم جانیں، بچے، خاندان اس کی قیمت چکاتے ہیں۔ دنیا کو جاگنا ہوگا۔ ہمیں امن چاہیے، دکھاوا نہیں۔ہر جان قیمتی ہے۔ ہر قوم کو تحفظ کا حق حاصل ہے۔‘
اداکار نے یہ بھی کہا کہ ’بین الاقوامی برادری کو فوری اور فیصلہ کن طور پر مداخلت کرنی چاہیے تاکہ اس جنون کو روکا جا سکے۔ واحد حقیقی حل بات چیت ہے۔ بات کریں۔ سنیں۔ مسئلہ حل کریں۔‘
انہوں نے یہ بھی کہا کہ ’اس خطے اور دنیا بھر میں اربوں زندگیاں اسی پر منحصر ہیں۔‘
خیال رہے کہ علی ظفر ناصرف پاکستان بلکہ بھارت میں بھی اپنی اداکاری کے جوہر دکھا چکے ہیں۔ علی ظفر نے بالی وڈ کی کئی کامیاب فلموں میں کام کیا جن میں ’تیرے بن لادن‘، ’میرے برادر کی دلہن‘، ’لندن پیرس نیویارک‘ ، ’ چشمے بدور’، ’ڈیئر زندگی‘ شامل ہیں۔
