کراچی (شوبز ڈیسک) سینئر اداکارہ بشریٰ انصاری نے اسٹیج اداکارہ روبی انعم کی تنقید پر کھری کھری سنا دیں۔
روبی انعم نے وی لاگنگ شروع کرنے پر بشریٰ انصاری پر تنقید کی تھی جس کے جواب میں لیجنڈری اداکارہ نے نئے وی لاگ میں ردعمل دیتے ہوئے کہا کہ انٹرنیٹ پر ہونے والی ایسی باتیں سستی شہرت حاصل کرنے کی کوشش ہیں۔
بشریٰ انصاری نے کہا کہ شکر ہے معین اختر، عمر شریف اور ضیا محی الدین وقت پر عزت سے دنیا سے رخصت ہوگئے کیونکہ آج کل گھٹیا باتیں سننے کو ملتی ہیں۔
انہوں نے بغیر نام لیے طنز کرتے ہوئے کہا کہ میں تو جانتی بھی نہیں کہ یہ لوگ کون ہیں، ہوسکتا ہے شہرت کا مزہ چکھنے کے لیے ایسی باتیں کی گئی ہوں۔
بشریٰ انصاری نے مزید کہا کہ امیتابھ بچن کی مثال سب کے سامنے ہے، وہ 84 یا 95 سال کے ہوں، ان کا ذکر ہمیشہ عزت سے ہونا چاہیے۔
اداکارہ نے کہا کہ زبان کا صحیح استعمال انسان کی پہچان ہے، اگر الفاظ کا چناؤ غلط ہو تو نہ صرف لوگوں کی بلکہ اللّٰہ کی پکڑ بھی ہو سکتی ہے۔
