کراچی (شوبز ڈیسک) معروف اداکارہ و ماڈل سائرہ یوسف نے کہا ہے کہ بیٹی نوریح کی پرورش کے دوران انہیں اپنی انا کو قربان کرنا پڑا۔
اداکارہ نے یہ بات صنم جنگ کے پوڈکاسٹ میں گفتگو کے دوران کہی۔ ان کا کہنا تھا کہ علیحدگی کے باوجود والدین کی مشترکہ ذمہ داری جسمانی اور ذہنی مضبوطی کا تقاضا کرتی ہے۔ اس تجربے نے انہیں اپنی ذات سے بالاتر ہوکر سوچنا سکھایا۔
پروگرام میں ان سے ویلنٹائن ڈے کی وائرل تصویر پر بھی سوال ہوا جس میں وہ بیٹی نوریح، سابق شوہر شہروز سبزواری، صدف کنول کی بیٹی زہرا اور اپنی بھتیجی کے ساتھ خوشگوار موڈ میں نظر آئیں۔ مداحوں نے اس رویے کو مثبت قرار دیا تھا۔ سائرہ نے کہا: “زہرا، نوریح کی بہن ہے، اور جب بات نوریح کی ہو تو میں خود سے متعلق نہیں سوچتی۔”
یاد رہے کہ سائرہ اور شہروز کی شادی 2012 میں ہوئی تھی، 2020 میں دونوں کے درمیان علیحدگی ہوگئی۔ بعدازاں شہروز نے صدف کنول سے شادی کی اور ان کے ہاں بیٹی زہرا پیدا ہوئی۔
