کیرالہ (نیوز ڈیسک) ملیالم ریپر ہیرن داس مرلی المعروف ویدن کو ایک خاتون ڈاکٹر سے ریپ کے الزام میں پولیس نے گرفتار کرلیا۔

بھارتی میڈیا کے مطابق ویدن کو 27 اگست کو کیرالہ ہائی کورٹ نے شادی کے جھوٹے وعدے اور عصمت دری کے کیس میں مشروط ضمانت دی تھی اور انہیں مسلسل دو دن تحقیقاتی ٹیم کے سامنے پیش ہونے کا حکم دیا گیا تھا۔ تاہم دوسرے دن کی پوچھ گچھ کے دوران پولیس نے انہیں حراست میں لے لیا۔

پولیس حکام کا کہنا ہے کہ ویدن کو ضمانت پر رہا کرنے سے قبل طبی معائنہ کیا جائے گا۔

یہ مقدمہ ایک خاتون ڈاکٹر کی جانب سے دائر کیا گیا تھا جس نے الزام لگایا کہ ریپر نے 2021 میں انسٹاگرام کے ذریعے دوستی کی، شادی کا وعدہ کیا اور 2021 سے 2023 کے دوران کوزی کوڈ، کوچی اور دیگر مقامات پر کئی بار اس کا جنسی استحصال کیا۔