دی ناٹیکل انسٹیٹیوٹ آف پاکستان کے وفد نے بانی پاکستان کو خراج عقیدت پیش کرنے کے لیے مزار قائد کا دورہ کیا۔ وفد کی قیادت چیئرمین کیپٹن ایس ایم فرید مسعود نے کی، جس میں مرچنٹ نیوی کے تمام رینک کے افسران اور جوان شامل تھے۔
پاک بحریہ کے بینڈ نے وفد کا شاندار استقبال کیا، جس کے بعد شرکا نے قائداعظم کے مزار پر پھولوں کی چادر چڑھائی اور فاتحہ خوانی کی۔ اس دوران ینگ کیڈٹس کو ایوان نوادارت کا خصوصی دورہ بھی کروایا گیا، جہاں انہوں نے بانی پاکستان کے زیر استعمال گاڑیوں، ملبوسات اور دیگر یادگار اشیاء کا مشاہدہ کیا۔
چیئرمین کیپٹن فرید مسعود نے کہا کہ قائداعظم محمد علی جناح کے اقوال پر عمل کرنا اور ان سے عقیدت کا اظہار کرنا ہر پاکستانی پر لازم ہے، کیونکہ ان کی بے مثال جدوجہد کے بعد ہی پاکستان ایک آزاد ملک کے طور پر دنیا کے نقشے پر ابھرا۔
انہوں نے مزید کہا کہ مرچنٹ نیوی کے افراد دنیا بھر میں پاکستان کے سفیر کے برابر سمجھے جاتے ہیں، جو اپنے پیشہ ورانہ فرائض انجام دیتے ہوئے محفوظ سفر کو یقینی بناتے ہیں، اور یہ کمیونٹی اپنے پیشے پر فخر محسوس کرتی ہے۔