کراچی: بورڈ آف سیکنڈری ایجوکیشن کراچی کی جانب سے نویں جماعت کے سال 2025 کے نتائج میں نمبرز اور گریڈز شامل نہ کیے جانے پر صوبائی وزیر برائے جامعات و تعلیمی بورڈز اسماعیل راہو نے سخت نوٹس لے لیا ہے۔وزیر نے چیئرمین میٹرک بورڈ سے تین روز میں تحریری وضاحت طلب کر لی ہے۔
اسماعیل راہو کی جانب سے چیئرمین کراچی بورڈ کو ارسال کیے گئے مراسلے میں کہا گیا ہے کہ بورڈ نے 23 اکتوبر کو نتائج کا اعلان کیا، تاہم نہ تو طلبہ کے مجموعی نمبرز جاری کیے گئے اور نہ ہی مضامین کے حساب سے گریڈز یا تفصیلات فراہم کی گئیں۔خط کے مطابق، بورڈ کی جانب سے صرف کامیاب طلبہ کے رول نمبرز مختلف ذرائع سے جاری کیے گئے، جو نتائج کے روایتی اور مستند طریقہ کار سے واضح انحراف ہے۔
وزیر نے اس صورتحال پر تشویش کا اظہار کرتے ہوئے کہا کہ نمبرز اور گریڈز ظاہر نہ کرنے سے طلبہ اور والدین میں بے چینی اور شکوک و شبہات جنم لے رہے ہیں، جبکہ نتائج کی شفافیت پر بھی سوالات اٹھ رہے ہیں۔
اسماعیل راہو نے کنٹرولر امتحانات اور آئی ٹی انچارج کو ہدایت دی ہے کہ نتائج کے اعلان میں طے شدہ طریقۂ کار سے انحراف کی وجوہات اور تمام حقائق تین یوم میں تحریری طور پر رپورٹ کیے جائیں تاکہ ذمہ داری کا تعین کیا جا سکے۔