بھارت کی شمال مشرقی ریاستوں ناگالینڈ، منی پور اور آسام میں علیحدگی کی تحریکیں ایک بار پھر شدت اختیار کر گئی ہیں۔ ناگالینڈ نیشنلسٹ موومنٹ کے سربراہ تھونگالینگ میووہ نے بھارتی افواج کے بڑھتے ہوئے مظالم اور ثقافتی دباؤ کے خلاف سخت ردعمل ظاہر کرتے ہوئے کہا ہے کہ ان کی آزادی کی جدوجہد کبھی رکے گی نہیں۔
تھونگالینگ میووہ نے بھارتی حکومت اور افواج کو خبردار کرتے ہوئے کہا کہ وہ اپنے موقف پر ڈٹے رہیں گے اور کبھی بھارت کے آگے سر تسلیم خم نہیں کریں گے۔ ان کا کہنا تھا کہ ناگالینڈ کے عوام پر منظم ظلم و جبر روا رکھا جا رہا ہے جبکہ دہلی حکومت ریاست کی شناخت، ثقافت اور خودمختاری کو ختم کرنے کے لیے پالیسی سطح پر اقدامات کر رہی ہے۔
اسی دوران منی پور اور آسام میں بھی علیحدگی پسند گروہوں کی سرگرمیاں بڑھ گئی ہیں، اور مقامی تنظیمیں نئی دہلی کے اثر و رسوخ کے خلاف اتحاد بنانے کی کوششیں تیز کر رہی ہیں۔
واضح رہے کہ بھارت متعدد علاقوں پر غیر قانونی قبضہ برقرار رکھے ہوئے ہے، جن میں مقبوضہ کشمیر، جونا گڑھ، ناگالینڈ اور دیگر ریاستیں شامل ہیں، اور دہائیوں سے وہاں آزادی کی تحریکیں جاری ہیں۔ تاہم، مودی حکومت نے ان آوازوں کو دبانے کے لیے فوجی طاقت کا بے دریغ استعمال کیا ہے۔