پشاور/اسلام آباد (اصغر چوہدری) – چیئرمین مرکزی رویتِ ہلال کمیٹی اور بادشاہی مسجد لاہور کے خطیب مولانا عبدالخبیر آزاد نے گورنر خیبرپختونخوا فیصل کریم کنڈی سے ملاقات کی۔ گورنر ہاؤس پشاور میں ہونے والی ملاقات میں علاقائی حالات، مذہبی ہم آہنگی اور پاکستان کو درپیش چیلنجز پر تفصیلی تبادلہ خیال کیا گیا۔
مولانا عبدالخبیر آزاد نے افغانستان کے حالیہ رویّے پر تشویش کا اظہار کرتے ہوئے کہا کہ پاکستان نے ہمیشہ افغانستان پر احسانات کیے، لیکن افسوس آج انہی کا شر پاکستان پر اثر انداز ہو رہا ہے۔ انہوں نے کہا کہ حالیہ تین سے چار گھنٹے کی جنگ نے بھارت کے غرور کو خاک میں ملا دیا، اور بھارت اب افغانستان میں اپنے پرانے رابطے اور سازشی جال دوبارہ سرگرم کر رہا ہے، جو پاکستان اور خود افغانستان کے لیے نقصان دہ ہے۔
گورنر خیبرپختونخوا فیصل کریم کنڈی نے کہا کہ پاکستان میں ہونے والی ہر دہشت گردی میں افغانستان کی ملوثت پائی جاتی ہے، جس کی پشت پناہی بھارت اور اسرائیل کر رہے ہیں، تاہم پاک فوج اور عوام متحد ہو کر ان سازشوں کو ناکام بنا رہے ہیں۔
گورنر نے مذہبی قیادت پر زور دیا کہ وہ قومی اتحاد میں مثبت کردار ادا کرے اور اختلافات کو بھڑکانے کے بجائے اتحاد اور برداشت کا پیغام عام کرے۔ انہوں نے کہا کہ نوجوانوں اور عوام میں اشتعال کے بجائے ذمہ داری، صبر اور تحمل کا شعور پیدا کیا جانا چاہیے۔