عمران خان کی بہنوں کے اڈیالہ جیل کے قریب دھرنے کے دوران پولیس کی چائے پیش کرنے کی انوکھی حکمت عملی نے ماحول کو دلچسپ بنا دیا۔
ایکسپریس نیوز کے مطابق گزشتہ شب شدید سردی میں ایس ایچ او صدر بیرونی اعزاز عظیم نے بانی پی ٹی آئی کی بہنوں سمیت دھرنے میں شریک شرکا کو چائے پیش کی۔ اس موقع کی ویڈیو سوشل میڈیا پر وائرل ہو گئی، جس میں ماحول خوشگوار اور دوستانہ نظر آتا ہے۔
ویڈیو میں علیمہ خان مسکراتے ہوئے چائے کا کپ اٹھاتے دکھائی دیتی ہیں، جبکہ ایس ایچ او اعزاز عظیم کی جانب سے چائے پیش کرنے کے جملے بھی واضح طور پر سنے جا سکتے ہیں۔ اسی طرح علامہ ناصر اور نعیم پنجوتھا کو بھی چائے کی پیشکش کی جاتی ہے، اور وہ کپ اٹھا کر چائے پیتے نظر آتے ہیں۔
دھرنے کے دوران شرکا ہاتھوں میں کپ لیے شدید سردی میں چائے کا لطف اٹھاتے دکھائی دیے۔ یہ مناظر، جہاں کبھی سختی اور کبھی مذاکرات نظر آتے، سوشل میڈیا پر دلچسپی کا باعث بنے اور ایس ایچ او اعزاز عظیم کے اس دوستانہ انداز کو شہریوں کی جانب سے سراہا جا رہا ہے۔