وفاقی حکومت نے آئندہ پانچ سال کے دوران ملائیشیا کو حلال گوشت کی برآمدات بڑھا کر 52 کروڑ ڈالر تک لے جانے کا ہدف مقرر کر لیا ہے۔ اس مقصد کے لیے حلال گوشت کو ترجیحی برآمدی شعبہ قرار دے دیا گیا ہے۔
حکام کے مطابق حکومت نے ایک جامع منصوبہ تیار کیا ہے، جس کے تحت اگلے پانچ سال میں ملائیشیا کو ایک لاکھ 30 ہزار میٹرک ٹن حلال گوشت برآمد کیا جائے گا۔ اس منصوبے سے نہ صرف قیمتی زرمبادلہ حاصل ہوگا بلکہ لائیو اسٹاک کے شعبے کو بھی فروغ ملے گا۔
منصوبے کے تحت ملائیشیا کو گوشت برآمد کرنے کے لیے تقریباً پانچ لاکھ 52 ہزار مویشی درکار ہوں گے۔ لائیو اسٹاک سیکٹر میں اس دوران 14 کروڑ ڈالر کی سرمایہ کاری کی جائے گی، جس میں سے 8 کروڑ ڈالر نجی شعبہ جبکہ 6 کروڑ ڈالر حکومت فراہم کرے گی۔
حکام کا کہنا ہے کہ برآمدات کے معیار کو بہتر بنانے کے لیے جانوروں کی ویکسینیشن، جدید کولڈ اسٹوریج اور دیگر سہولیات بھی قائم کی جائیں گی تاکہ پاکستان عالمی منڈی میں حلال گوشت کی ایک قابلِ اعتماد سپلائر کے طور پر اپنی جگہ مضبوط کر سکے۔