شہر قائد کے علاقے ملیر، جامعہ ملیہ غزالی گراؤنڈ کے قریب عوام نے مبینہ طور پر لوٹ مار کرنے والے ایک ڈاکو کو پکڑ کر تشدد کے بعد پولیس کے حوالے کر دیا۔
کراچی پولیس کے ترجمان کے مطابق زخمی حالت میں گرفتار ملزم کی شناخت خلیل ولد احمد کے نام سے ہوئی ہے۔ بتایا گیا ہے کہ ملزم عوام کے تشدد اور فائرنگ کے نتیجے میں گولی لگنے سے زخمی ہوا اور اسی حالت میں پولیس کے حوالے کیا گیا۔
اطلاع ملنے پر تھانہ الفلاح کی پولیس موقع پر پہنچی اور ملزم کو تحویل میں لے لیا۔ پولیس نے ملزم کے قبضے سے پستول بھی برآمد کر لیا، جبکہ زخمی ملزم کو فوری طبی امداد کے لیے جناح اسپتال منتقل کیا گیا۔
پولیس کے مطابق ملزم سے مزید تفتیش جاری ہے اور اس کے سابقہ کرمنل ریکارڈ اور ممکنہ دیگر جرائم کے حوالے سے بھی تحقیقات کی جا رہی ہیں۔