وزیر اعلیٰ پنجاب کی ہدایت پر کم آمدن والے افراد کے لیے ایک نیا ہاؤسنگ منصوبہ شروع کر دیا گیا ہے، جس کے تحت اڑھائی سے 3 مرلہ سرکاری اراضی پر 37 ہزار سے زائد گھروں کی تعمیر ممکن ہوگی۔
وزیر ہاؤسنگ بلال یاسین کو پنجاب افورڈایبل ہاؤسنگ کے پراجیکٹ ڈائریکٹر عمران علی سلطان نے بریفنگ دیتے ہوئے بتایا کہ ورلڈ بینک کے تعاون سے پنجاب کے 25 اضلاع کے 35 مقامات پر یہ منصوبہ شروع ہوگا، جن میں لاہور، گوجرانوالہ، فیصل آباد، ملتان، سیالکوٹ، لیہ اور خانیوال شامل ہیں۔
وزیر ہاؤسنگ بلال یاسین نے کہا کہ سرکاری اراضی پر اگلے تین ماہ میں پرائیویٹ سیکٹر کے تعاون سے تعمیراتی کام کا آغاز ہوگا۔ مستحق خاندانوں کو اپنے گھر فراہم کرنا وزیر اعلیٰ پنجاب مریم نواز کی اولین ترجیحات میں شامل ہے۔
انہوں نے مزید کہا کہ پانچ سال کی مدت میں ”اپنی چھت اپنا گھر“ پروگرام کے تحت 5 لاکھ سے زائد خاندانوں کو گھر فراہم کیے جائیں گے، اور افورڈایبل ہاؤسنگ پراجیکٹ میں کم سے کم قسطوں کی رقم مقرر کی جائے گی تاکہ کم آمدن والے افراد بھی اپنے گھر خرید سکیں۔