اسپیکر پنجاب اسمبلی ملک احمد خان نے کہا ہے کہ وزیر اعلیٰ پنجاب مریم نواز کے خلاف نازیبا زبان کا استعمال ایک مخصوص مائنڈ سیٹ کی نشانی ہے۔ لاہور میں پریس کانفرنس کے دوران انہوں نے کہا کہ جب انہیں اطلاع ملی کہ وزیر اعلیٰ پنجاب اسمبلی میں آنا چاہتے ہیں تو خوشی ہوئی، لیکن ان کے ساتھ ایسے افراد بھی ایوان میں آئے جن کے نام تک ہمارے پاس نہیں تھے۔
ملک احمد خان نے مزید کہا کہ جب ان افراد کے نام لسٹوں میں چیک کیے گئے تو وہ دھکے دینے لگے۔ اسپیکر نے وزیر اعلیٰ خیبر پختونخوا سہیل آفریدی کے لاہور دورے کے حوالے سے بھی کہا کہ پنجاب اسمبلی کا ہر عمل قانون کے تابع ہے۔ انہوں نے واضح کیا کہ اسمبلی میں داخلے کے لیے اجازت نامہ یا کم از کم شناختی کارڈ ضروری ہے اور سیکیورٹی کے معاملے کو کسی صورت نظر انداز نہیں کیا جا سکتا۔